ދަނޑުވެރިކަމުގެ ދާއިރާގައި ރިސޯޓްތަކާއެކު އެއްބާރުލުން އިތުރުކުރުމަށް ވަޒީރު މާރިޔާ ކްރޮސްރޯޑްސްއަށް

ރިސޯޓްތަކާއި ދަނޑުވެރިކަމާއި ބެހޭ ވުޒާރާ އާއި ދެމެދު އެއްބާރުލުން އިތުރުކުރެވިދާނެ ދާއިރާތައް ދެނެގަތުމަށް، ދަނޑުވެރިކަމާއި ބެހޭ ވަޒީރު ޑރ. މަރްޔަމް މާރިޔާ އަދި އެ ވުޒާރާގެ ޓީމެއް އިއްޔެ ކްރޮސްރޯޑްސް މޯލްޑިވްސް ރިސޯޓަށް ޒިޔާރަތްކުރައްވައިފިއެވެ.

ދަނޑުވެރިކަމާއި ބެހޭ ވުޒާރާއިން ބުނީ މި ޒިޔާރަތުގައި ވަޒީރު މާރިޔާ ވަނީ ރިސޯޓުގެ ދަނޑުތަކުގައި ކާނާ އުފައްދާ ގޮތްތަކާއި، ބަދިގެއަށް ބޭނުންވާ ތަކެތި އުފައްދާ ގޮތްތައް ބައްލަވާލައްވާފައެވެ. އަދި އެތަނުގެ ގަސްގަހާގެހި އިންދާ ބަލަހައްޓާ ގޮތްތަކާއި، ތަރުކާރީ އުފެއްދުމަށް ބޭނުންކުރާ އައު ޓެކްނޮލޮޖީތަކާއިބެހޭ މަޢުލޫމާތު ހޯއްދަވާފައެވެ.

ވުޒާރާއިން ބުނި ގޮތުގައި މި ދަތުރުން ފާހަގަކުރެވުނު މުހިންމު ކަންތައްތަކުގެ ތެރޭގައި ރިސޯޓުން ދެމެހެއްޓެނިވި ގޮތެއްގައި ކަންކަން ކުރުމަށް ގެންގުޅޭ އުސޫލުތަކާއި، ކާނާ އުފެއްދުމުގައި ގެންގުޅޭ އައު ގޮތްތަކުގެ ތަރުތީބުކަމާއި ފުރިހަމަކަން ހިމެނެއެވެ. އަދި ރާއްޖޭގެ ދަނޑުވެރިކަން ކުރިއެރުވުމުގައި ރިސޯޓުތަކަށް އަދާކުރެވިދާނެ މުހިންމު ދައުރު ވެސް ފާހަގަކުރެވުނު ކަމަށް ވުޒާރާއިން ބުންޏެވެ.

ވަޒީރު މާރިޔާ ވިދާޅުވި ގޮތުގައި ރިސޯޓުތަކާއި މިނިސްޓްރީއާ ދެމެދު އެއްބާރުލުން އިތުރުކުރެވިދާނެ ދާއިރާތަކުގެ ތެރޭގައި ރާއްޖޭގައި އުފައްދާ ތަކެތި ގަތުން އިތުރުކުރުމާއި، ހައިޑްރޯޕޯނިކްސް ފަދަ އައު ޓެކްނޮލޮޖީތަކަށް އިންވެސްޓް ކުރުމާއި، ރާއްޖޭގެ ދަނޑުވެރިންނަށް ހުނަރު ހިއްސާކުރުން ހިމެނެއެވެ.

މި މަސައްކަތްތަކުގެ މައިގަނޑު މަޤްޞަދަކީ ރާއްޖޭގައި އުފައްދާ ކާނާ އިތުރުކޮށް، ދެމެހެއްޓެނިވި ގޮތްތައް ކުރިއަރުވައި، ބޭރުން އެތެރެކުރާ ތަކެއްޗަށް ބަރޯސާވާ މިންވަރު މަދުކުރުން ކަމަށް ވަޒީރު ވިދާޅުވިއެވެ. މީގެ ސަބަބުން ފަތުރުވެރިކަމުގެ ސިނާޢަތަށާއި މުޅި މުޖުތަމަޢަށް ފައިދާކުރާނެ، އަދި ދެމެހެއްޓެނިވި ކާނާގެ ނިޒާމެއް ޤާއިމުކުރުމަށް މަގުފަހިވެގެންދާނެ ކަމަށް ވެސް ވުޒާރާއިން ފާހަގަކުރިއެވެ.