ވަޒީރު މާރިޔާ ތޮއްޑޫ ދަނޑުވެރިންނާ ބައްދަލުކުރައްވައިފި

ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރްޔަމް މާރިޔާ، އަރިއަތޮޅު އުތުރުބުރީ ތޮއްޑޫއަށް ވަޑައިގެން، އެރަށުގެ ދަނޑުވެރިންނާ ބައްދަލުކުރައްވައި، އެފަރާތްތަކުގެ ކަންބޮޑުވުންތައް އަޑުއައްސަވައިފިއެވެ.

މިއީ ވަޒީރުކަމާ މާރިޔާ ހަވާލުވެވަޑައިގެންނެވުމަށްފަހު ދަނޑުވެރިންގެ ކަންބޮޑުވުންތައް އަޑުއެއްސެވުމަށް ރަށަކަށް ކުރެއްވި ފުރަތަމަ ދަތުރުފުޅެވެ.

ދަނޑުވެރިކަމުގައި މަޝްޙޫރު ރަށެއްގެ ގޮތުގައި ފާހަގަކުރެވޭ ތޮއްޑޫއަށް ކުރެއްވި މި ދަތުރުފުޅުގައި ވަޒީރު ވަނީ ރަށު ކައުންސިލާއި ބައްދަލުކުރައްވައި، ތޮއްޑޫގެ ދަނޑުތަކަށް ޒިޔާރަތްކުރައްވާފައެވެ.

ކައުންސިލާއެކު ބޭއްވި ބައްދަލުވުމުގައި ވަޒީރު ވަނީ ދަނޑުވެރިންގެ ކަންބޮޑުވުންތަކާއި، ކާބޯތަކެތީގެ ރައްކާތެރިކަމާއި، އަދި ދަނޑުވެރިންނަށް އެހީތެރިވުމަށް ކުރިއަށްދާ އަދި ރޭވިފައިވާ މަޝްރޫޢުތަކާ ގުޅޭގޮތުން މަޝްވަރާކުރައްވާފައެވެ. އަދި ދަނޑުވެރިންގެ ކަންބޮޑުވުންތަކަށް ޢަމަލީ ޙައްލުތައް ހޯދުމަށް ކަމާގުޅޭ ފަރާތްތަކާއެކު ވުޒާރާއިން މަސައްކަތްކުރާނެ ކަމުގެ ޔަޤީންކަން ދެއްވާފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅާ އެއްގޮތަށް، ތޮއްޑޫއަކީ ދަނޑުވެރިކަމުގެ ތަޖުރިބާ ހޯދުމަށް މީހުން ޒިޔާރަތްކުރާ މަންޒިލަކަށް ހެދުމުގެ ލަނޑުދަނޑި ހާޞިލުކުރުމަށް ކައުންސިލާއި ދަނޑުވެރިންނާއެކު ސަރުކާރުން މަސައްކަތްކުރާނެ ގޮތްތަކާ ގުޅޭގޮތުންވެސް ވަޒީރު ވަނީ މަޝްވަރާކުރައްވާފައެވެ.

މީގެ އިތުރުން، ވަޒީރު ވަނީ ރިސޯޓުތަކާ ގުޅިގެން ރާއްޖޭގެ ދަނޑުވެރިކަމުގެ ސިނާއަތް ފުޅާކުރުމަށް ހުރި ފުރުޞަތުތައް ދެނެގަތުމުގެ މަސައްކަތްވެސް ފައްޓަވާފައެވެ. އެގޮތުން، ރިސޯޓުތަކަށް ބޭނުންވާ ތަރުކާރީއާއި މޭވާގެ ބާވަތްތައް ރަށުގެ ދަނޑުތަކުގައި ހައްދާ ގޮތްތަކުގެ މަޢުލޫމާތު އޮޅުންފިލުވުމަށް މަސައްކަތްތަކެއް ކުރިއަށްދާކަން ފާހަގަކުރެވެއެވެ.