ދަނޑުވެރިކަމުގެ ދާއިރާގައި ޒުވާނުންގެ ހިއްސާ އިތުރުކުރުމަށްޓަކައި، އެ ދާއިރާއިން ޒުވާނުންނަށް ބޭނުންވާ އިތުރު އެހީތެރިކަން ފޯރުކޮށްދީ، އެފަރާތްތައް ބާރުވެރިކުރުވުމަށް ގިނަ މަޝްރޫޢުތަކެއް ކުރިޔަށް ގެންދިއުމަށް ރާވަމުން އަންނަ ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.
ވަޒީރު މާރިޔާ މިފަދައިން ވިދާޅުވީ ގދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެ އަތޮޅުގެ ބައެއް ޒުވާން ދަނޑުވެރިންނާއި ބައްދަލުކުރެއްވުމަށްފަހުގައެވެ. މި ބައްދަލުވުމުގައި ވަޒީރު ފާހަގަކުރެއްވި ގޮތުގައި، ފަހަކަށް އައިސް ދަނޑުވެރިކަމުގެ ދާއިރާގައި ޒުވާނުންގެ ބައިވެރިވުން އިތުރުވަމުން އަންނަކަން ފާހަގަކުރެއްވިއެވެ.
"ދަނޑުވެރިކަމަކީ ހަމައެކަނި އާމްދަނީ ހޯދުމުގެ ވަސީލަތެއް ނޫން. އަދި ޤައުމުގެ ކާބޯތަކެތީގެ ރައްކާތެރިކަން ކަށަވަރުކުރުމަށް މުހިންމު ދައުރެއް އަދާކުރާ ދާއިރާއެއް. ޒުވާނުންނަށް އިތުރު އެހީތެރިކަމާއި ބާރުވެރިކުރުވުމަށް އަޅުގަނޑުމެން ގިނަ މަޝްރޫޢުތަކެއް ކުރިއަށް ގެންދިއުމަށް ރާވަމުން ގެންދަން،" ވަޒީރު މާރިޔާ ވިދާޅުވިއެވެ.
Advertisement
ވަޒީރު އިތުރަށް ވިދާޅުވީ، ޒުވާނުންގެ ޝައުޤުވެރިކަމާއި ހުނަރު ދަނޑުވެރިކަމުގެ ސިނާޢަތުގައި ހިމެނިގެން ދިއުމަކީ ރަނގަޅު ފާލެއް ކަމަށެވެ. އޭރުން އެ ސިނާޢަތް އައު ޚިޔާލުތަކާއި ޒަމާނީ ޓެކްނޮލޮޖީއާއެކު ކުރިއަރަމުންދާނެ ކަމަށް ވަޒީރު ފާހަގަކުރެއްވިއެވެ.
މި ބައްދަލުވުމުގައި ޒުވާން ދަނޑުވެރިންނާއި މަޝްވަރާކުރައްވައި، އެ ފަރާތްތަކުގެ ކަންބޮޑުވުންތަކާއި ހުށަހެޅުންތައް ވަޒީރު އަޑުއެއްސެވިއެވެ. އަދި ދަނޑުވެރިކަމުގެ ދާއިރާ ތަރައްޤީކުރުމަށް ސަރުކާރުން ގެންގުޅުއްވާ ވިސްނުންފުޅުތަކާއި ބެހޭގޮތުން މަޢުލޫމާތު ދެއްވިއެވެ.
ވަޒީރުގެ މި ދަތުރުފުޅަކީ ރާއްޖޭގެ އެކި ކަންކޮޅުތަކުގައި ދަނޑުވެރިކަމުގެ ޙާލަތު ދެނެގަތުމަށާއި، އެ ދާއިރާގައި ހަރަކާތްތެރިވާ ފަރާތްތަކާއި ސީދާ ބައްދަލުކޮށް މަޝްވަރާކުރެއްވުމަށް ކުރައްވާ ދަތުރުފުޅުތަކުގެ ތެރެއިން ދަތުރުފުޅެކެވެ.
