ވޮއިސް އޮފް މޯލްޑިވްސް އަލުން ފަށަނީ

ދިވެހިންގެ މެދުގައި މަޤްބޫލުވެފައިވާ މިއުޒިކް ޝޯއެއް ކަމަށްވާ "ވޮއިސް އޮފް މޯލްޑިވްސް" އަނެއްކާވެސް ގެނެސްދޭން ދައުލަތުގެ މީޑިއާއިން ނިންމައިފި ކަމަށް ޕަބްލިކް ސަރވިސް މީޑިއާ (ޕީއެސްއެމް) އިން ރޭ ބުނެފިއެވެ.

"ވޮއިސް އޮފް މޯލްޑިވްސް" އަކީ ކުރިން މޯލްޑިވްސް ނޭޝަނަލް ބްރޯޑްކާސްޓިން ކޯޕަރޭޝަނުގެ ނަމުގައި ޕީއެސްއެމް ހިންގި ދުވަސްވަރު ގެނެސްދިން ޕްރޮގްރާމެކެވެ. މި ޕްރޮގްރާމަކީ ރާއްޖޭގެ އެކި ކަންކޮޅުތަކުން ލަވަކިޔުމުގައި ފާހަގަކޮށްލެވޭ ފަރާތްތައް ހޮވާލައިގެން ކުރިއަށް ގެންދިޔަ ޝޯއެކެވެ. ނަމަވެސް ދެތިން ސީޒަން ގެނެސްދިނުމަށްފަހު މި ޕްރޮގްރާމު ވަނީ ހުއްޓިފައެވެ.

ޕްރޮގްރާމު އަލުން ލޯންޗްކުރުމުގެ ރަސްމިއްޔާތުގައި "ވޮއިސް އޮފް މޯލްޑިވްސް" ޕްރޮގްރާމު ލޯންޗްކޮށްދެއްވީ ފިޝަރީޒް މިނިސްޓަރު އަހުމަދު ޝިޔާމެވެ. މި ޕްރޮގްރާމުގެ މަޤްޞަދުތަކުގެ ތެރޭގައި މުނިފޫހިފިލުވުމާއި، ހުނަރުވެރިން އިތުރުކުރުމާއި، ދިވެހިންގެ މެދުގައި އޮތް ފޯރި އަނބުރާ ގެނައުމުގެ އިތުރުން ފަންނުވެރިންނަށް އާ ޕްލެޓްފޯމެއް ގެނެސްދިނުން ހިމެނެއެވެ.

މީގެ އިތުރުން، ޕީއެސްއެމްއިން ވަނީ ކުރިން މަޤްބޫލުވެފައިވާ އެހެން ޕްރޮގްރާމުތަކެއް ވެސް އަލުން ފެށުމަށް ނިންމާފައެވެ. މީގެ ތެރޭގައި "ބޮޑުބެރު ޗެލެންޖް" އާއި "މޯލްޑިވިއަން އައިޑަލް" ހިމެނެއެވެ. އަދި އިޖުތިމާޢީ ޚިދުމަތްތެރިންނާއި ދަރުމަވެރިންގެ ޚިދުމަތްތަކުގެ އަގު ވަޒަންކުރުމުގެ ގޮތުން "ޕީއެސްއެމް ލެންސް" ގެ ނަމުގައި އެވޯޑެއް ވެސް ތަޢާރަފުކޮށްފައިވެއެވެ.