ޕީއެސްއެމްގެ މެނޭޖިންގ ޑިރެކްޓަރު އިސްތިއުފާދެއްވީ ޞިއްޙީ ސަބަބުތަކަށްޓަކައި

ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުކަމުގެ މަޤާމުން މުޙައްމަދު ސަޢީދު އިއްޔެގެ ވަގުތެއްގައި އިސްތިއުފާދެއްވައިފިއެވެ. ސިއްޙީ ސަބަބުތަކާއި ގުޅިގެން ރާއްޖެއިން ބޭރުން ދިގު މުއްދަތަކަށް ފަރުވާ ހޯއްދަވަން ޖެހިވަޑައިގަންނަވާތީ އިސްތިއުފާދެއްވި ކަމަށް ސަޢީދު ވިދާޅުވިއެވެ.

ޕީއެސްއެމްގެ ހިންގުން ސަޢީދުއާއި ޙަވާލުކުރެއްވީ މިއަހަރުގެ އޯގަސްޓް 24 ވަނަ ދުވަހުއެވެ. އޭގެފަހުން ފާއިތުވި 4 މަހެއްހާ ދުވަހު ޕީއެސްއެމްގެ ކުރިއެރުމަށް ގިނަގުނަ މަސައްކަތްތަކެއް ކުރައްވާފައިވާކަމަށް ޕީއެސްއެމުން ބުނެއެވެ. އަދި ސަޢީދުގެ އެމްޑީ ކަމުގައި ޕީއެސްއެމްގެ ހިންގުމަށް ހެޔޮ ބަދަލުތަކެއް ގެނެވިފައިވާ ކަމަށްވެސް ޕީއެސްއެމުން ފާހަގަކުރިއެވެ.

ސަޢީދަކީ ތަޢުލީމީ ރޮނގުން މަތީ ފެންވަރުގެ ތަޖުރިބާކާރެއްކަން ފާހަގަކުރެވެއެވެ. 1989 ވަނަ އަހަރުން ފެށިގެން ސަރުކާރުގެ އެކި މަޤާމުތައް ފުރުއްވާފައިވާ ސަޢީދު، އެޑިއުކޭޝަން މިނިސްޓްރީގެ ޕަރމަނަންޓް ސެކްރެޓަރީކަމާއި ޑިރެކްޓަރ ޖެނެރަލްގެ މަޤާމު ފުރުއްވާފައިވެއެވެ. މީގެ އިތުރުން، މީޑިއާ އޮފިސަރެއްގެ މަޤާމުން ފެށިގެން ތަޢުލީމީ ދާއިރާގެ އެކިއެކި މަޤާމުތަކުގައި މަސައްކަތްކުރައްވާފައިވެއެވެ.

ސަޢީދު އިސްތިއުފާދެއްވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ޝުކުރު އަދާކުރައްވާފައިވެއެވެ. އެމަނިކުފާނު ސަޢީދުއަށް އިތުބާރުކުރައްވައި ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމަށް އައްޔަންކުރެއްވި ކަމަށްޓަކައި ޝުކުރުވެރިވެ ވަޑައިގަންނަވާ ކަމަށް ސަޢީދު ވިދާޅުވިއެވެ.