ޕަބްލިކް ސަރވިސް މީޑީއާ، ޕީއެސްއެމްގެ މެނޭޖަރ އޮޕަރޭޝަންސް ނިއުސް އެންޑް ކަރަންޓް އެފެއަރޒްގެ މަޤާމުން އިއްޔެ ވަކިކުރި މޯލްޑިވްސް މީޑިއާ ކައުންސިލްގެ ރައީސް އަޙްމަދު މުޞްޠަފާގެ ވަޒީފާ މިއަދު އަނބުރާ އިޢާދަކޮށްފިއެވެ.
ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު ޢަބްދުﷲ ޔާމީން އާއި ޙަވާލާދީ މީޑިއާއަކުން ރިޕޯޓްކުރި ގޮތުގައި، އެތަނުގައި މަސައްކަތް ކުރަމުންދާތާ 30 އަހަރު ވެފައިވާ މުސްޠަފާގެ ވަޒީފާ އަނބުރާ އިޢާދަކުރަން ނިންމާފައިވަނީ އޭނާ ވަޒީފާއިން ވަކިކުރި މައްސަލަ ކުންފުނީގެ ބޯޑުން ބެލުމަށްފަހު، އިޢާދަކުރަންޖެހޭ ސަބަބުތަކެއް ހުރިކަމަށް ފެނުމުންނެވެ. މިކަމާއި ގުޅޭގޮތުން މިއަދު ހަވީރު ބައްދަލުވުމެއް ބޭއްވުނު ކަމަށް ޕީއެސްއެމްގެ މެނޭޖިން ޑިރެކްޓަރު މުޙައްމަދު ސައީދުވެސް ވަނީ ކަށަވަރުކޮށްދެއްވާފައެވެ.
މުޞްޠަފާ ވަޒީފާއިން ވަކިކުރީ އިއްޔެއެވެ. އޭނާ ވަކިކުރީ 11 ވަނަ ނޫސްވެރިކަމުގެ އިނާމު ދިނުމުގެ ޙަފްލާ ޕީއެސްއެމްއިން ވަގުތުން ދެއްކިއިރު، އެ ޙަފްލާގައި ޕީއެސްއެމްގެ އެޑިޓޯރިއަލާއި ޚިލާފު ކޮންޓެންޓާއި އަދި ނޫސްވެރިކަމުގެ ޢާއްމު މިންގަނޑުތަކާއި ޚިލާފު ވީޑިއޯއެއް، ދައްކާފައިވާ މައްސަލައިގައެވެ.
Advertisement
އޭނާ މީޑިއާ ކައުންސިލަށް އިންތިޚާބުކުރެވިފައިވަނީ ޓީވީއެމް ތަމްސީލްކުރާ މެންބަރެއްގެ ގޮތުގައެވެ. އަދި ކައުންސިލްގެ ރައީސްކަމަށް އިންތިޚާބުކުރެވިފައިވަނީ މީގެ ދެ އަހަރު ކުރިންނެވެ.
އެވޯޑް ހަފްލާގައި ހިންގާދިޔަ ކަންތައްތަކާއި ގުޅިގެން މީޑިއާކައުންސިލްގެ ރައީސްގެ ހައިސިއްޔަތުން އަޙްމަދު މުސްޠަފާ މިއަދު ނެރުއްވި ބަޔާނެއްގައި ވިދާޅުވީ އެ ކައުންސިލުން ބޭއްވި އެވޯޑް ހަފްލާގެ އެއްވެސް ކަމެއްގައި ކައުންސިލްގެ ރައީސްގެ ހައިސިއްޔަތުން އޭނާގެ ސީދާ ބައިވެރިވުމެއް ނެތްކަމަށެވެ.
