ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރުގެ މަޤާމަށް އިބްރާހީމް ނަސްރީން (ނައްޓު) އައްޔަންކޮށްފިއެވެ. މިއީ މި ސަރުކާރުގެ ދައުރުގައި މި މަޤާމަށް އައްޔަންކުރެވުނު ތިންވަނަ އެމްޑީއެވެ.
ނައްޓުއަކީ މީގެ ކުރިން ޕީއެސްއެމްގެ ސޭލްސް އެންޑް މާކެޓިން ޑިރެކްޓަރުގެ މަޤާމާއި ޗީފް ކޮމާޝަލް އޮފިސަރުގެ މަޤާމު ފުރުއްވާފައިވާ ބޭފުޅެކެވެ. އަދި މޯލްޑިވްސް އޯޝަން ޕްލާސްޓިކް އެލަޔަންސް (މޮޕާ)ގެ އެގްޒެކެޓިވް ބޯޑު މެންބަރެއްގެ ގޮތުގައި ވެސް މަސައްކަތްކުރައްވާ ބޭފުޅެކެވެ.
ނައްޓު މި މަޤާމަށް އައްޔަންކުރެވުނީ ޕީއެސްއެމްގެ ކުރީގެ މެނޭޖިން ޑިރެކްޓަރު މުޙައްމަދު ސައީދު މިދިޔަ އަންގާރަ ދުވަހު މަޤާމުން އިސްތިއުފާ ދެއްވުމާއި ގުޅިގެންނެވެ.
