ރަސްފަންނު ސަރަޙައްދުގައި ބޭއްވުމަށް ހަމަޖެހިފައިވާ "އަންބަލަން 2025" ގެ ޙަރަކާތްތައް ކުރިއަށް ގެންދިއުމާއި ގުޅޭ އެއްބަސްވުމުގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ ސޮސައިޓީ ފޯރ ހެލްތް އެޑިއުކޭޝަން (ޝީ) އާއި މާލެ ސިޓި ކައުންސިލް އަދި މާލެ ސިޓީ އަންހެނުން ތަރައްޤީއަށް މަސައްކަތް ކުރާ ކޮމިޓީ (ޑަބްލިޔުޑީސީ) އިންނެވެ.

މި މަހުގެ 20 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ކުރިއަށް ގެންދިއުމަށް ނިންމާފައިވާ 'އަންބަލަން' ޙަރަކާތަކީ ޘަޤާފީ ޙަރަކާތްތަކަކާއި އެކު، ސިއްޙީ މަޢުލޫމާތު އާންމުންނަށް ފޯރުކޮށްދިނުމުގެ އިތުރުން އާންމުންނަށް ހުޅުވާލައިގެން އެ ބޭފޫޅުންގެ ބައިވެރިވުން އެކުލެވޭގޮތަށް ކުރިޔަށް ގެންދެވޭ ކުލަގަދަ ޙަރަކާތެއް ކަމަށް ކައުންސިލުން ބުންޏެވެ.

ކައުންސިލުން ބުނީ މި ޙަރަކާތުގައި ކުޑަކުދިންނާ ގުޅޭ ތަފާތު އެކި ޘަޤާފީ އަދި މަޖާ ޙަރަކާތްތައް ދައްކުވައިދޭ ސްޓޯލްތައް ހުންނާނެ ކަމަށެވެ.

މީގެ އިތުރުން އަތްތެރި މަސައްކަތް ދައްކުވައިދޭ ސްޓޯލްތަކާއި ކުޑަކުދިންގެ ހުނަރު ދައްކުވައިދޭ އަތްތެރި މަސައްކަތުގެ ސްޓޯލްތަކާއި އަންނައުނު ވިއްކާ ސްޓޯލްތަކާއި ކުޑަކުދިން ކުޅޭ ތަކެތި ވިއްކާ ސްޓޯލްތަކާއި ދިވެހިން ތައްޔާރުކުރާ ޕޭސްޓްރީގެ އެކި ބާވަތްތައް ވިއްކާ ސްޓޯލްތަކުގެ އިތުރުން އެކި ބާވަތްތަކުގެ ކާ ބޯތަކެތި ވިއްކާ ސްޓޯލްތައް ވެސް ''އަންބަލަން'' ޙަރަކާތުގައި ފެނިގެން ދާނެ ކަމަށް ކައުންސިލުން ބުންޏެވެ.

ކައުންސިލުން ބުނީ ދެ ދުވަހަށް ބަހާލައިގެން ކުރިއަށް ގެންދިއުމަށް ރޭވިފައިވާ ފޯރިގަދަ ސްޓޭޖް ޝޯތަކާއެކު ބޮޑުބެރުގެ ޙަރަކާތްތައް ވެސް ރޭވިފައިވާ ކަމަށެވެ.

ކައުންސިލުން ބުނީ އިހު ޒަމާނުގެ ސަޤާފީ ވާހަކަތަކުގައި އުޅޭ ކެރެކްޓާރސް ގެ ދައްކާލުން ވެސް ސްޓޭޖް ޙަރަކާތްތަކުގެ ތެރޭގައި ހިމެނޭނެ ކަމަށެވެ. އަދި ކޮމީޑިއަން އެކްޓަރ ކާއްޓޭ އަދި މަޓޭއާއި އެކު މަޖާ ޢާއިލީ، އަދި އުފާވެރި މާޙައުލެއްގައި ތަފާތު އެކި ޙަރަކާތްތައް ކުރިއަށް ގެންދިއުމަށް ހަމަޖެހިފައިވާ ކަމަށްވެސް ކައުންސިލުން ބުންޏެވެ.

މި ޙަރަކާތްތައް ކުރިއަށް ގެންދަން ނިންމާފައިވާ ތާރީޚުތަކާއި ގަޑިތައް:

20 ފެބްރުއަރީ 2025 – 16:00 އިން 18:00 އަށް އަދި 20:00 އިން 23:00 އަށް.

21 ފެބްރުއަރީ 2025 – 16:00 އިން 18:00 އަށް އަދި 20:00 އިން 23:00 އަށް.

މި ޙަރަކާތްތަކުގައި ބައިވެރިވުމަށް ވީހާ ވެސް ގިނަ ބޭފުޅުން ޢާއިލާއާއި އެކު ވަޑައިގެން ވަގުތު ކޮޅެއް ހޭދަކޮށްލުމަށް ޙަރަކާތްތައް އިންތިޒާމްކުރާ ފަރާތްތަކުން ވަނީ އެދިފައެވެ.