މާލެ ސިޓީ ކައުންސިލުން ރައްޔިތުންނާ ބައްދަލުކުރުމަށް ބޭއްވި އެންމެ ދެ ގަޑިއިރެއްހާއިރުގެ ބައްދަލުވުމަކަށް ބައި މިލިއަނަށް ވުރެ ގިނަ ރުފިޔާ ހަރަދުކޮށްފައިވާކަން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އާންމުވި ރަސްމީ ހިސާބުތަކުން ހާމަވެއްޖެއެވެ. މި އަހަރުގެ ތެރޭގައި އެ ކައުންސިލުން ބޭއްވި ދެ ބައްދަލުވުމަކަށް ޖުމްލަ 1.1 މިލިއަނަށް ވުރެ ގިނަ ރުފިޔާ ހޭދަކޮށްފައިވާއިރު، މިއިން ކޮންމެ ބައްދަލުވުމަކަށް ވަނީ ބައި މިލިއަނަށް ވުރެ ގިނަ ރުފިޔާ ހަރަދުކޮށްފައެވެ.
މި ހަރަދުތަކުގެ ތަފްސީލަށް ބަލާއިރު، މި އަހަރުގެ ފެބުރުވަރީ މަހު ބޭއްވި ފުރަތަމަ ބައްދަލުވުމަށް ޖުމްލަ 567,839 ރުފިޔާ ހަރަދުވެފައިވެއެވެ. އޭގެ ތެރެއިން ބިޑް އުސޫލުން އެކަނިވެސް 360,000 ރުފިޔާ ހޭދަކޮށްފައިވާއިރު، ބައްދަލުވުމަށް ހާއްސަކޮށްގެން ތައްޔާރުކުރި ވީޑިއޯ ޕްރެޒެންޓޭޝަނަށް 135,000 ރުފިޔާ ވަނީ ހަރަދުކޮށްފައެވެ.
މީގެ އިތުރުން ބެނާ ޕްރިންޓު ކުރުމަށް 30,024 ރުފިޔާ އަދި ޓީވީން ލައިވް ކުރުމަށް 34,607 ރުފިޔާ ވަނީ ހޭދަކޮށްފައެވެ.
Advertisement
ޖުލައި މަހު ބޭއްވި ދެވަނަ ބައްދަލުވުމަށް ޖުމްލަ 585,137 ރުފިޔާ ހަރަދުވެފައިވާއިރު، މީގެ ތެރެއިންވެސް އަމިއްލަ ފަރާތަކަށް 360,000 ރުފިޔާ ހޭދަކޮށްފައި ވެއެވެ. އަދި ސިންގަލް ސޯސް އުސޫލުން ވަކި ބަޔަކާއި ހަވާލުކޮށްގެން ހެދި ވީޑިއޯ ޕްރެޒެންޓޭޝަނަށް 129,600 ރުފިޔާ ހަރަދުކޮށްފައިވާއިރު، ބެނާ ޕްރިންޓް ކުރުމަށް 34,992 ރުފިޔާ، ފޮޓޯއާއި ވީޑިއޯ ނެގުމަށް 18,000 ރުފިޔާ އަދި ބެނާ ދެމުމަށް 5,700 ރުފިޔާ ވަނީ ހޭދަކޮށްފައެވެ.
މާލެ ސިޓި ކައުންސިލުން ކުރު ވަގުތުކޮޅެއްގެ ބައްދަލުވުންތަކަކަށް ރައްޔިތުންގެ ފައިސާއިން މިހާ ބޮޑު ހޭދައެއް ކުރުމުން އާންމުންގެ ބޮޑެތި ފާޑުކިޔުންތަކެއް ވަނީ ކައުންސިލަށް އަމާޒުވެފައެވެ.
