ދެކުނު ކޮރެއާގެ މަޝްހޫރު ބަތަލާ ކިމް ސެއި-ރޮން، 24 އަހަރުގެ އުމުރުގައި މަރުވެއްޖެއެވެ. ފުލުހުން ބުނާގޮތުގައި ކިމް ސެއި-ރޮންގެ ހަށިގަނޑު ފެނިފައިވަނީ ބުދަ ދުވަހުގެ ހެނދުނު އޭނާގެ ގެއިންނެވެ.
ފުލުހުން މަޢުލޫމާތު ދީފައިވާ ގޮތުގައި، އޭނާގެ މަރާއި ގުޅޭގޮތުން ތަޙުޤީޤު ކުރިއަށްދާ ކަމަށާއި ނަމަވެސް އޭނާގެ މަރުގައި ޝައްކުވާ ކަހަލަ ކަމެއް ނެތް ކަމަށް ފާހަގަކޮށްފައި ވެއެވެ.
ކިމް ސެއި-ރޮންއަކީ ކުޑައިރުއްސުރެ ފިލްމީ ދާއިރާގައި މަސައްކަތް ކުރަމުން އައި ފަންނާނެކެވެ. އޭނާ ފުރަތަމަ ފަހަރަށް ސްކްރީނުގައި ފެނުނީ 2009 ވަނަ އަހަރު، އޭރު އޭނާގެ އުމުރުން 9 އަހަރުގައެވެ. އޭގެ ފަހުން އޭނާވަނީ ގިނަ ފިލްމުތަކާއި ޓީވީ ސީރީސް ތަކުގައި މަސައްކަތް ކޮށްފައެވެ.
އޭނާގެ ކެރިއަރުގައި ލިބިފައިވާ އެވޯޑުތަކުގެ ތެރޭގައި 2010 ވަނަ އަހަރު ދެކުނު ކޮރެއާއިން އެންމެ ބޮޑު އާމްދަނީއެއް ހޯދި ފިލްމު "ދަ މޭން ފްރޮމް ނޯވާ" އާއި 2012 ގެ ތުރިލާ "ދަ ނެއިބަރ" އިން ލިބުނު އެވޯޑުތައް ހިމެނެއެވެ. އޭނާގެ އެންމެ ފަހުގެ އެކްޓިންގ މަސައްކަތަކީ 2021 ވަނަ އަހަރު ނެރުނު "ދަ ގްރޭޓް ޝަމަން ގާ ޑޫ-ޝިމް" ނަމަކަށް ކިޔާ ޑްރާމާއެވެ. އަދި އެންމެ ފަހުން ކުޅުނު ރޯލަކީ ނެޓްފްލިކްސްއިން 2023 ވަނަ އަހަރު ގެނެސްދިން ކޮރެއާ ޑްރާމާ "ބްލަޑްހައުންޑްސް" އެވެ.
ކިމް ސެއި-ރޮންގެ ހިތާމަވެރި މަރާއި ގުޅިގެން ދެކުނު ކޮރެއާގެ އެންޓަޓެއިންމަންޓް އިންޑަސްޓްރީގެ ގިނަ ފަރާތްތަކުން ވަނީ ހިތާމަ ފާޅުކޮށްފައެވެ. އަދި އޭނާގެ ގިނަ ފޭނުން ވެސް ވަނީ އޭނާގެ ހަނދާނުގައި މީސް މީޑިއާގައި ޕޯސްޓްތައް ކޮށްފައެވެ.
