މެކްސިކޯގެ ޒަޕޯޕަންގައި ހުންނަ ގުއަޑަލަޖާރާ ސްޓޭޑިއަމްގައި މިއަދު ހެނދުނު 07:00 ގައި ކުޅުނު ވޯލްޑް ކަޕްގެ ދެވަނަ މެޗުގައި، ދެކުނު ކޮރެއާއިން ފަހަތުން އަރައި 2-1 އިން ޗެކް ރިޕަބްލިކް ބަލިކޮށްފިއެވެ.

މި މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ އާދައިގެ ކުޅުމެކެވެ. ނަތީޖާއެއްގެ ގޮތުން ފުރަތަމަ ހާފު ނިމިގެން ކުޅުންތެރިން ދަނޑުން ފޭބިއިރު ސަޕޯޓަރުންގެ ފަރާތުން ނުރުހުމުގެ އަޑުތައް އަމާޒުވިއެވެ. ނަމަވެސް، ދެވަނަ ހާފު ފެށިގެން 59 ވަނަ މިނެޓުގައި ޗެކް ރިޕަބްލިކްގެ ކެޕްޓަން ލަޑިސްލާވް ކްރެޖްޗީ ވަނީ ބޮލުން ފޮނުވާލި ހަމަލާއަކުން ލަނޑެއް ޖަހައި އެ ޓީމަށް ކުރިހޯދައިދީފައެވެ.

ދެކުނު ކޮރެއާއިން މެޗުގެ ނަތީޖާ ހަމަހަމަކުރީ 67 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ހުވާންގް އިން-ބިއޮމް އެވެ. އޭނާ މި ލަނޑު ޖެހީ ޗެކް ރިޕަބްލިކްގެ ދެ ކުޅުންތެރިން ކައިރިން ވަރަށް ހުޝިޔާރުކަމާއެކު ނައްޓާލުމަށްފަހުއެވެ. މެޗުން ދެކުނު ކޮރެއާ މޮޅުވި ލަނޑު 80 ވަނަ މިނެޓުގައި ކާމިޔާބުކޮށްދިނީ އޯ ހިޔޮން-ގްޔޫ އެވެ. މި ލަނޑު ޖެހުމަށް ފުރުސަތު ތަނަވަސްކޮށްދިނީވެސް ފުރަތަމަ ލަނޑު ޖެހި ހުވާންގް އެވެ.

ދުނިޔޭގެ ރޭންކިންގެ 25 ވަނައިގައި އޮތް ދެކުނު ކޮރެއާއިން މި މެޗު ކޮންޓްރޯލްކޮށް ގިނަ ހަމަލާތަކެއް އުފެއްދިއެވެ. 2006 ވަނަ އަހަރަށްފަހު ފުރަތަމަ ފަހަރަށް ވޯލްޑް ކަޕްގައި ވާދަކުރާ ޗެކް ރިޕަބްލިކްގެ މައްޗަށް ދެކުނު ކޮރެއާއިން ކުރިހޯދިއިރު، އެ ޓީމުގެ ތަރި ސޮން ހިއުންގް-މިންގެ ފަރާތުން މޮޅު ކުޅުމެއް ފެނިގެންދިޔައެވެ.

މި މެޗު ބެލުމަށް 44,985 ސަޕޯޓަރުން ދަނޑަށް ވަދެފައިވާއިރު، ސްޓޭޑިއަމްގެ ބައެއް ސަރަހައްދުތަކުން ހުސް ގޮނޑިތައް ފެންނަން ހުއްޓެވެ.

މި މުބާރާތުގެ ފުރަތަމަ މެޗުގައި މެކްސިކޯ އިން ވަނީ 2-0 އިން ސައުތު އެފްރިކާ ބަލިކޮށްފައެވެ. މިހާރު ގްރޫޕް އޭގެ އެއްވަނައިގައި މެކްސިކޯ އޮތްއިރު، ދެކުނު ކޮރެއާ އޮތީ ދެވަނައިގައެވެ. ތިންވަނައިގައި ޗެކް ރިޕަބްލިކް އޮތްއިރު، ފުލުގައި އޮތީ ސައުތު އެފްރިކާއެވެ.

މި ގްރޫޕްގެ ދެން އޮތް މެޗުތައް ކުޅުމަށް ހަމަޖެހިފައިވަނީ ޖޫން 18 ގައެވެ. އެދުވަހު މެކްސިކޯ ނުކުންނާނީ ދެކުނު ކޮރެއާއާ ދެކޮޅަށެވެ. އަދި ޗެކް ރިޕަބްލިކް ބައްދަލުކުރާނީ ސައުތު އެފްރިކާއާއެވެ. މި އަހަރުގެ ވޯލްޑް ކަޕްގައި 12 ގްރޫޕް ހިމެނޭއިރު، ކޮންމެ ގްރޫޕަކުން އެންމެ މޮޅު ދެ ޓީމާއި، ތިންވަނައަށްދާ އެންމެ ރަނގަޅު 8 ޓީމު ގަދަ 32 ގެ ބުރަށް ހޮވޭނެއެވެ.