ހައްޖުގެ ނިޒާމު ހަރުދަނާ ކުރުމަށް ކުރަމުންދާ މަސައްކަތުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ދައުރުގައި ޙައްޖަށް ދިއުމަށް ކުރާ ހޭދަ ކުޑަކުރެވޭނެ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
"އަހާ ފޯރަމް" ގައި ވާހަކަފުޅު ދައްކަވަމުން ވަޒީރު ޝަހީމް ވިދާޅުވީ، ހައްޖުގެ ނިޒާމު ހަރުދަނާ ކުރުމަކީ ރައީސް ޚާއްސަ އިސްކަމެއް ދެއްވާ ކަމެއް ކަމަށެވެ. އަދި ރައީސްގެ އިރުޝާދުފުޅާއެކު ހައްޖަށް މީހުން ގެންދިއުމުގެ އަގު ކުޑަކުރުމަށް ހައްޖު ކޯޕަރޭޝަނުން މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ.
"ހައްޖަށް މީހުން ދިއުމުގެ އަގު ކުޑަކުރުމަށް މޯލްޑިވްސް ހައްޖު ކޯޕަރޭޝަނުން ތަސައްވުރެއް ކަނޑައަޅުއްވައިގެން އޭގެ ދަށުން މަސައްކަތް އެބަ ކުރަމުންދޭ. މިއަދު މިވެނި ދުވަހެއްގައި ހާސިލުވާނެޔޭ ދަންނަވަން ދަތި. އެހެންނަމަވެސް ރައީސް މުޢިއްޒުގެ މި ދައުރުގެ ތެރޭގައި އިރާދަކުރެއްވިއްޔާ އެއަށް ހަރުދަނާ ހައްލެއް އަންނާނެ،" ވަޒީރު ވިދާޅުވިއެވެ.
ރާއްޖެއިން ހައްޖަށް މީހުން ގެންދިއުމަށް ހައްޖު ކޯޕަރޭޝަނުގައި ޤާއިމު ކޮށްފައިވާ ކިއުގައި 9,000 މީހުން ތިބިކަން ސަރުކާރުން ފާހަގަކުރައްވައެވެ. އަދި ކޯވިޑާއި ގުޅިގެން ހައްޖަށް ގެންދިއުމަށް އޮތް ދަތިކަން މިހާރު ނެތްކަން ފާހަގަކުރައްވައި، އަންނަ އަހަރުން ފެށިގެން ކިއުއަށް ބައެއް ބަދަލުތައް ގެނައުމަށް ނިންމަވާފައިވާ ކަމަށް ވަޒީރު ވިދާޅުވިއެވެ.
އެގޮތުން އުމުރުން ދުވަސްވީ މީހުންނާއި، ޚާއްސަ ހާލަތްތައް މެދުވެރިވެފައިވާ ފަރާތްތަކަށް އަންނަ އަހަރުން ފެށިގެން ލުއިތަކެއް ދިނުމަށް ވަޒީރުންގެ މަޖިލީހުން ނިންމަވާފައިވާ ކަމަށް އިސްލާމީ ކަންތައްތަކާބެހޭ ވަޒީރު ޑރ. ޝަހީމް ވިދާޅުވިއެވެ.
