އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގެ ފުރަތަމަ މެޗުތަކުގައި މާޒިޔާ ސްޕޯޓްސް ކްލަބް އާއި ކްލަބް ވެލެންސިއާ އިން ކާމިޔާބުކޮށް، މުބާރާތުގެ ފެށުން ރަނގަޅުކޮށްފިއެވެ.

ރޭ ކްލަބް ވެލެންސިއާ އިން ވަނީ ބުރު ސްޕޯޓްސް ކްލަބްގެ މައްޗަށް 2-0 ގެ ނަތީޖާއަކުން މޮޅުވެފައެވެ. މެޗުގެ 10 ވަނަ މިނެޓުގައި ލަހުފާން އަހުމަދު ޝަހީމް ވަނީ ވެލެންސިއާ އަށް ލީޑު ހޯދައިދީފައެވެ. ދެވަނަ ހާފު ނިމެން ކައިރިވަނިކޮށް އަހުމަދު ކައިން ވަނީ ވެލެންސިއާގެ ދެވަނަ ގޯލު ޖަހާފައެވެ.

އިއްޔެ ހަވީރު ގަލޮޅު ދަނޑުގައި މާޒިޔާ އިން ވަނީ މުބާރާތުގައި އެންމެ ކާމިޔާބު އެއް ޓީމު ކަމަށްވާ ކްލަބް އީގަލްސް 3-1 ގެ ނަތީޖާއަކުން ބަލިކޮށްފައެވެ. މެޗުގެ ހަތްވަނަ މިނެޓުގައި މުހައްމަދު އިމާން އަހުމަދު ވަނީ މާޒިޔާ އަށް ލީޑު ހޯދައިދީފައެވެ. ފުރަތަމަ ހާފު ނިމުމުގެ ކުރިން މުހައްމަދު އިލާން އިމްރާން ވަނީ މާޒިޔާގެ ލީޑު އިތުރަށް ފުޅާކޮށްދީފައެވެ. މާޒިޔާގެ ތިންވަނަ ގޯލު 60 ވަނަ މިނެޓުގައި ޖަހާފައިވަނީ އަނޫފް އަބްދުﷲ އެވެ. އީގަލްސްގެ ހަމައެކަނި ގޯލު ފެނުނީ މެޗުގެ 85 ވަނަ މިނެޓުގައެވެ. މި ލަނޑު ޖެހީ އީމާން މުހައްމަދު ވަހީދު އެވެ.

މި މުބާރާތުގައި ޖުމްލަ 9 ޓީމު ބައިވެރިވެފައިވެއެވެ. ގްރޫޕް އޭގައި ހިމެނެނީ އީގަލްސް، މާޒިޔާ، ވެލެންސިއާ، ބުރު އަދި ގްރީން ސްޓްރީޓްސް އެވެ. ގްރޫޕް ބީގައި ހިމެނެނީ އޮޑި، ޓީސީ، ސަސް އަދި ވިކްޓަރީ އެވެ.

މިއަދު ވެސް ދެ މެޗެއް ކުޅޭނެއެވެ. ފުރަތަމަ މެޗުގައި އޮޑި ސްޕޯޓްސް ކްލަބުން ނުކުންނާނީ ވިކްޓަރީ ސްޕޯޓްސް ކްލަބާއި ދެކޮޅަށެވެ. ދެވަނަ މެޗުގައި ޓީސީ ސްޕޯޓްސް ކްލަބުން ނުކުންނާނީ ސުޕަ ޔުނައިޓެޑް ސްޕޯޓްސް (ސަސް) އާއި ދެކޮޅަށެވެ.