ދުންފަތް ކޮންޓްރޯލްކުރުމުގެ އާންމު ގަވާއިދަށް ގެނެވުނު އިސްލާހަކާއި ގުޅިގެން، އިލެކްޓްރޯނިކް ސިނގިރޭޓާއި ވޭޕްކުރަން ބޭނުންކުރާ އާލާތްތައް ހިފެހެއްޓުމުގެ ބާރު ތަންފީޛީ އިދާރާތަކަށް ދީފިއެވެ. މި ގަވާއިދުގެ ދަށުން، މިފަދަ އާލާތެއް ފެނިއްޖެނަމަ އިތުރު ކޯޓު އަމުރަކާއި ނުލައި އެތަކެތި ތަންފީޛީ އިދާރާގެ ބެލުމުގެ ދަށަށް ގެނެވޭނެއެވެ.

މިދިޔަ ނޮވެންބަރު 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން މަނާކުރެވުނެވެ. މިއާއި ގުޅިގެން، ދުންފަތް ކޮންޓްރޯލްކުރުމުގެ އާންމު ގަވާއިދުގައި ވޭޕާއި ގުޅޭގޮތުން އިތުރު ފިޔަވަޅުތަކެއް އަޅާފައިވެއެވެ.

ގަވާއިދުގައި ބަޔާންކޮށްފައިވާ ގޮތުން، ރާއްޖެއަށް އެތެރެކުރުން މަނާ މިފަދަ އެއްޗެއް ފެނިއްޖެނަމަ އެފަރާތެއް 2,000 ރުފިޔާއިން ޖޫރިމަނާ ކުރެވޭނެއެވެ. އަދި މިފަދަ އާލާތެއް ތަންފީޛީ އިދާރާގެ ބެލުމުގެ ދަށަށް ގެނައުމަށް ހުރަސް އަޅައިފި ނަމަ، އާންމު ފަރުދެއްނަމަ 50,000 ރުފިޔާއިން ޖޫރިމަނާކުރެވޭނެއެވެ. ވިޔަފާރިއަކުން މިފަދަ ކަމެއް ކޮށްފިނަމަ، 100,000 ރުފިޔާއިން ޖޫރިމަނާކުރުމާއެކު ވިޔަފާރި ހުއްދަ ބާޠިލުކުރުމަށް ހުށަހެޅޭނެއެވެ.

އެގޮތުން، މި ގަވާއިދުގެ ދަށުން ތަންފީޛީ އިދާރާތަކުގެ ގޮތުގައި ކަނޑައަޅާފައިވަނީ މިނިސްޓްރީ އޮފް ހެލްތާއި، ދިވެހި ފުލުހުންގެ ޚިދުމަތާއި، އިޤްތިޞާދީ ސިޔާސަތު ތަންފީޛު ކުރުމުގެ ޒިންމާ އެވަގުތަކު ހަވާލު ކޮށްފައިވާ ވުޒާރާއާއި، ސިޓީ ކައުންސިލްތަކާއި އަދި ރަށު ކައުންސިލްތައް ހިމެނެއެވެ.

މީގެ އިތުރުން، މި އައު ގަވާއިދުގެ ދަށުން ކުރެވޭ ޖޫރިމަނާތައް 14 ދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކައި ޚަލާޞްކުރަން ޖެހެއެވެ. އަދި މިގޮތަށް ޢަމަލު ނުކޮށްފިނަމަ، ދުންފަތުގެ ވިޔަފާރި ކުރުމަށް ދޫކޮށްފައިވާ ހުއްދަ ބާޠިލު ކުރުމުގެ ބާރު މިނިސްޓްރީ އޮފް ހެލްތަށް ލިބިގެން ވެއެވެ.

މި ގަވާއިދުގެ ދަށުން އަޅާ ފިޔަވަޅުތަކާމެދު ހިތްހަމަނުޖެހޭނަމަ، އެކަމުގެ ޝަކުވާ މިނިސްޓްރީ އޮފް ހެލްތަށް ހުށަހެޅުމުގެ ފުރުޞަތު މައްސަލަ ރައްދުވާ ފަރާތަށް ލިބިގެންވެއެވެ. މިނިސްޓްރީން 15 ދުވަހުގެ ތެރޭގައި އެ މައްސަލައެއް ބަލައި ޖަވާބުދާރީ ވާންޖެހޭނެއެވެ.