ޕާކިސްތާނުން ރާއްޖޭގެ ޚާއްޞަ އެހީއަށް ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް މަޝްވަރާކޮށްފިއެވެ. މި މަޝްވަރާތައް ކުރެވުނީ ޕާކިސްތާނުން ރާއްޖެއަށް ކަނޑައަޅުއްވާފައިވާ އާ ސަފީރު ވައިސް އެޑްމިރަލް ރިޑަޔާޓް ފައިސަލް ރަސުލް ލޯދީ އާއި އިޖްތިމާއީ އަދި އާއިލާ ތަރައްޤީއާއި ބެހޭ ވަޒީރު އައިޝަތު ޝިހާމް އާއެކު ބޭއްވުނު ބައްދަލުވުމެއްގައެވެ.
އިޖްތިމާއީ ތަރައްޤީއާ ބެހޭ ވުޒާރާއިން މަޢުލޫމާތު ދިންގޮތުގައި، މި ބައްދަލުވުމުގައި ދެ ޤައުމުގެ ދެމެދުގައި އެކި ދާއިރާތަކުން މަސައްކަތްކުރުމާއި ގުޅޭގޮތުން މަޝްވަރާކުރެވުނެވެ.
މި ބައްދަލުވުމަކީ ޕާކިސްތާނުގެ އާ ސަފީރު ވައިސް އެޑްމިރަލް ރިޑަޔާޓް ފައިސަލް ރަސުލް ލޯދީ ވަޒީރު އައިޝަތު ޝިހާމްއަށް ކުރެއްވި އިޙްތިރާމުގެ ޒިޔާރަތުގެ ތެރެއިން ބޭއްވުނު ބައްދަލުވުމެކެވެ. މި ބައްދަލުވުމުގައި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށާއި، ޚާއްޞަކޮށް އިޖްތިމާއީ ދާއިރާގައި އެއްބާރުލުން އިތުރުކުރުމަށް މަގުފަހިވާނެ ކަމަށް ވުޒާރާއިން ފާހަގަކުރިއެވެ.
