އޯގާތެރި މުޖުތަމަޢެއް ބިނާކޮށް، އަނިޔާވެރިކަން ނައްތާލުމަށް އެންމެ މުހިންމު އެއް މަސައްކަތަކީ، ދުރާލައި ޢާއިލާތައް ބާރުވެރި ކުރުން ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
ވަޒީރު މިހެން ވިދާޅުވީ، ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) އިން ބާއްވާ 2 ދުވަހުގެ މަދަނީ ޖަމުޢިއްޔާތަކުގެ މަހާސިންތާގެ ހުޅުވުމުގެ ރަސްމިއްޔާތުގައި ޝަރަފުވެރި މެހެމާނެއްގެ ގޮތުގައި ބައިވެރިވެ ވަޑައިގެން ދެއްކެވި ވާހަކަފުޅުގައެވެ.
ވަޒީރު ވިދާޅުވީ، އާއިލާތަކުގެ ތެރޭގައި ހަމަނުޖެހުމާއި ދަތިކަން އަދި އެހެނިހެން ނުރައްކާތެރި ހާލަތްތައް ދެނެގަނެ، އެފަދަ އާއިލާތަކަށް ދައުލަތުގެ ހުރިހާ މުއައްސަސާތައް ގުޅިގެން އެހީތެރިވުން މުހިންމު ކަމަށެވެ. މި މަޤްޞަދުގައި ވުޒާރާއިން ކުރިއަށް ގެންދާ މުހިންމު ދެ ޕްރޮގްރާމެއްގެ މަޢުލޫމާތު ވަޒީރު ހިއްސާކުރެއްވިއެވެ.
Advertisement
އޭގެ ތެރެއިން އެއް ޕްރޮގްރާމަކީ "އިބަމަ" ޕްރޮގްރާމެވެ. މި ޕްރޮގްރާމުގެ ދަށުން، ނާޒުކު ހާލަތުގައިވާ ފަރާތްތަކަށް އިޖްތިމާޢީ ޚިދުމަތްތަކާއި ރައްކާތެރިކަން ފޯރުކޮށްދިނުމަށް މަސައްކަތްކުރެއެވެ. ވަޒީރު ވިދާޅުވިގޮތުގައި މިހާތަނަށް ރާއްޖޭގެ 5 އަތޮޅެއްގެ 37 ރަށެއްގައި އިބަމަ ޤާއިމުކޮށް، ޖުމްލަ 194 ހިއްސާދާރުން ވަނީ ތަމްރީނު ކުރެވިފައިކަމަށެވެ.
ދެވަނަ ޕްރޮގްރާމަކީ "ހާލު ކިހިނެއް؟" ޕްރޮގްރާމެވެ. މި ޕްރޮގްރާމުގެ ދަށުން، ރާއްޖޭގެ ހުރިހާ ރަށެއްގެ ރައްޔިތުންގެ ގާތަށް ޒިޔާރަތްކޮށް، ޚާއްޞަ އެހީތެރިކަން ބޭނުންވާ ޢާއިލާތައް ދެނެގަނެއެވެ. މިހާތަނަށް 12 އަތޮޅެއްގެ 53 ރަށެއްގައި މި ޕްރޮގްރާމް ފަށައި، 22 ރަށެއްގައި ނިންމާލެވިފައިވާއިރު ޖުމުލަ 8027 ގޭބިސީއަށް ޒިޔާރަތްކުރެވި، ޢާއިލާތަކުގެ ހާލު ބެލިފައިވާކަމަށް ވަޒީރު ފާހަގަކުރެއްވިއެވެ.
ވަޒީރު ވިދާޅުވީ މި ޕްރޮގްރާމްތަކަކީ އަނިޔާވެރިކަމާއި ހުށަހެޅޭ މައްސަލަތައް މަދުކުރުމަށް އެޅުނު މުހިންމު ފިޔަވަޅުތަކެއް ކަމަށެވެ. އަދި މި ޕްރޮގްރާމްތަކުގެ ސަބަބުން ވަކި ޖިންސަކަށްވީތީ ކުރާ އަނިޔާއަށް ހުށަހެޅުމުގެ ފުރުސަތު އޮތް އެތައް ފަރާތެއްގެ ހާލަތު ކުރީ ބައިގައި ދެނެގަނެވި، އެ ފަރާތްތަކަށް އެހީތެރިވުމުގެ ފުރުސަތު ލިބިގެންދާ ކަމަށްވެސް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، މި ޕްރޮގްރާމްތަކަކީ ރައީސުލްޖުމްހޫރިއްޔާ ގެންގުޅުއްވާ އޯގާތެރި މުޖުތަމަޢުއެއް ބިނާކުރުމުގެ ތަޞައްވުރުގެ ތެރެއިން ކުރިއަށްގެންދެވޭ މުހިންމު މަސައްކަތްތަކެއް ކަމަށެވެ. މި މަސައްކަތްތަކުގެ މަޤްޞަދަކީ ދައުލަތުގެ ރައްކާތެރިކަމުގެ ވިއުގައިގެ ތެރެއިން އެއްވެސް މީހަކު ހަވާސާވެފައި ނުހުންނާނެ ކަން ކަށަވަރު ކުރުން ކަމުގައި ވަޒީރު ވިދާޅުވިއެވެ.
