އިސްރަށްވެހިންގެ ނާދީގެ އަހަރީ ދުވަސް ފާހަގަކޮށް، މެމްބަރޝިޕް ކާޑެއް ތަޢާރަފުކޮށްފި

ފުރަމާލޭގައި ޤާއިމްކޮށްފައިވާ އިސްރަށްވެހިންގެ ނާދީއަށް އެއް އަހަރު ފުރުން ކުލަގަދަކޮށް ފާހަގަކޮށް، މެމްބަރޝިޕް ކާޑެއް ތަޢާރަފުކޮށްފިއެވެ.

މި ޙަފްލާ ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދެވެ.

އިސްރަށްވެހިންގެ ނާދީއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅަކާ އެއްގޮތަށް ހުޅުވި އިސްރަށްވެހިންގެ ފުރަތަމަ އިޖްތިމާޢީ މަރުކަޒެވެ. މި ނާދީގައި ފާއިތުވި އަހަރުގެ ތެރޭގައި 300 އަށްވުރެ ގިނަ ޕްރޮގްރާމު ހިންގާފައިވާއިރު، އެ ޕްރޮގްރާމްތަކުގައި 7000 އަށްވުރެ ގިނަ މީހުން ބައިވެރިވެފައިވެއެވެ.

އަހަރީ ދުވަހުގެ ޙަފްލާގައި ތަޢާރަފުކުރި 'އިސްރަށްވެހިންގެ ނާދީ މެމްބަޝިޕް ކާޑު' އަކީ 55 އަހަރުން މަތީގެ ކޮންމެ ބޭފުޅަކަށް ލިބޭނެ ކާޑެކެވެ. މި ކާޑުން ޑޮކްޓަރަށް ދެއްކުމާއި، އެޕޮއިންޓްމެންޓް ހޯދުމުގައި ފަސޭހަތަކަކާއި، ފިހާރަތަކުން ޑިސްކައުންޓް ލިބުންފަދަ ފައިދާތައް ލިބިގެންދާނެއެވެ.

މި ޙަފްލާގައި ވާހަކަދައްކަވަމުން ވަޒީރު ޑރ. ޢާއިޝަތު ޝިހާމްވަނީ ފާއިތުވި އަހަރުގައި އިސްރަށްވެހިންގެ ނާދީގައި، އިސްރަށްވެހިންނަށް އަމާޒުކޮށްގެން ތަފާތު ހަރަކާތްތައް ހިންގަވާދެއްވި އެންމެހާ ފަރާތްތަކަށް ޝުކުރު އަދާކުރައްވާފައެވެ.