މި ސަރުކާރުގެ އަމާޒަކީ އަނިޔާ މަދުކުރެވޭނެ ގޮތަކަށް މަސައްކަތްތައް ރާވައި ބައްޓަންކުރުން ކަމަށް އިޖްތިމާޢީ އަދި ޢާއިލީ ތަރައްޤީއާބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ. ވަޒީރު މިހެން ވިދާޅުވީ ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) އިން ބޭއްވި 2 ދުވަހުގެ މަދަނީ ޖަމުޢިއްޔާތަކުގެ މަހާސިންތާގެ ހުޅުވުމުގެ ރަސްމިއްޔާތުގައި ޝަރަފުވެރި މެހެމާނެއްގެ ގޮތުގައި ބައިވެރިވެ ވަޑައިގެން ދެއްކެވި ވާހަކަފުޅުގައެވެ.
ވަޒީރު ވިދާޅުވީ، ވަކި ޖިންސަކަށްވީތީ ތަހައްމަލް ކުރަންޖެހޭ އަނިޔާ އަދި ގެވެށި އަނިޔާގެ މައްސަލަތައް އެ ވުޒާރާއަށް ކޮންމެ އަހަރަކު ވެސް ހުށަހެޅޭ ކަމަށެވެ. އަދި ދިވެހި ސަރުކާރުގެ މިހާރުގެ ސިޔާސަތު ކަމުގައިވާ "އޯގާތެރި މުޖްތަމަޢު" އަކީ މިފަދަ އަނިޔާވެރިކަން ނައްތާލުމަށް ކުރާ މަސައްކަތާ ސީދާ ގުޅިފައިވާ ކަމެއް ކަމަށް ވަޒީރު ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރަކީ ހުރިހާ ރައްޔިތުންނަށް ބޭނުންވާ ރައްކާތެރިކަމާއި ހިމާޔަތް ލިބިދެވޭ އަމާން މާޙައުލެއް ގާއިމުކޮށް، އެއްވެސް ފަރުދަކު ބާކީ ނުވާނެހެން އެންމެން ޝާމިލުވެ އުޅޭ އުފާވެރި އޯގާތެރި މުޖުތަމަޢެއް ތަރައްޤީކުރުމެވެ.
Advertisement
މީގެ އިތުރުން، ވަޒީރު ވިދާޅުވީ، ގެވެށި އަނިޔާގެ މައްސަލަތައް ރިޕޯޓްކުރުމަށް 24 ގަޑިއިރު ޚިދުމަތްދޭ ހެލްޕްލައިންގެ އެހީގައި ގިނަ ފަރާތްތަކަކަށް އަވަސް އެހީއެއް ފޯރުކޮށްދޭކަމަށެވެ. އަދި ގެވެށި އަނިޔާގެ ޝިކާރައަކަށްވާ ފަރާތްތަކަށް ވަގުތީ ގޮތުން ރައްކާތެރިކަން ފޯރުކޮށްދޭ މަރުކަޒުތައް އިތުރަށް ތަރައްޤީކޮށް، އިތުރު 3 މަރުކަޒެއް ރާއްޖޭގެ 3 ސަރަހައްދެއްގައި ޤާއިމްކުރުމުގެ މަސައްކަތް މިހާރު ވަނީ ފެށިފައި ކަމަށް ވެސް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، އަންހެނުންނަށް ކުރާ އަނިޔާތައް ހުއްޓުވުމަށް އަދި އެފަދަ އަނިޔާ ލިބޭ ފަރާތްތަކަށް ބޭނުންވާ އެހީތެރިކަމާއި، އޯގާވެރިކަމާއި، ރައްކާތެރިކަމާއި، އިންސާފު ކަށަވަރު ކުރުމަށް ޚާއްޞަ ޤައުމީ މަރުކަޒެއް ޤާއިމުކުރުމަކީ ރައީސް ޑރ. މުހައްމަދު މުޢިއްޒުގެ މެނިފެސްޓޯގައި ހިމެނިފައިވާ މުހިއްމު ވަޢުދުފުޅެއްކަމަށެވެ. އަދި މިކަމަށް މަގުފަހިކުރުވުމަށާއި ގެވެށި އަނިޔާ ހުއްޓުވުމުގެ ޤާނޫނީ އޮނިގަނޑު އިތުރަށް ހަރުދަނާކޮށް ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) ޚިދުމަތްދޭ ފަރާތްތައް ޖަވާބުދާރީކުރުވައި މަރުކަޒުކަމުގައި އެކަށައެޅި ޤާނޫނު ނަންބަރު 2012/3 (ގެވެށި އަނިޔާ ހުއްޓުވުމުގެ ޤާނޫނު) އަށް ގެންނަންޖެހޭ އިސްލާހުތައް ގެނައުމުގެ މަސައްކަތްތައް މިހާރު ފެށިފައިވާކަމަށެވެ.
ސަރުކާރުގެ އެންމެ ބޮޑު އެއް އަމާޒަކީ އަނިޔާ ލިބޭ ފަރާތްތަކަށް އަވަސް މިނެއްގައި ފެންވަރު ރަނގަޅު ޚިދުމަތްތަކަށް ލިބޭނެ އިންތިޒާމް ހަމަޖައްސައިދީ، އެފަރާތަށް ލިބިފައިވާ އަނިޔާއިން އަރައިގަތުމަށް ބޭނުންވާ އެހީތެރިކަން ފޯރުކޮށްދީ ރައްކާތެރި މާހައުލެއް ކަށަވަރުކުރުން ކަމަށް ވަޒީރު ވިދާޅުވިއެވެ.
