ހާއްސަ އެހީއަށް ބޭނުންވާ މީހުންނަށް ދޭ އެލަވަންސް މުރާޖާކުރުމުގެ މަސައްކަތް ކުރަމުންދާ ކަމަށް އިޖްތިމާޢީ އަދި ޢާއިލީ ތަރައްޤީއާބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ހާއްސަ އެހީއަށް ބޭނުންވާ މީހުންނަށް ދޭ އެލަވަންސް މުރާޖާކުރުމަކީ ރައީސް ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށާއި، މި މަސައްކަތް ކުރިއަށްދާ ކަމަށެވެ.
"އެކަން ކުރިއަށް އެބަދޭ ބަލައިގެން. މި މަސައްކަތް ފައްޓާއިރު ވިސްނަން ޖެހޭކަމަކީ އޭގެ މަޢުލޫމާތު ހުރި ގޮތުންނާއި ކުއްލިއަކަށް ވަކިން ދެވިފައި ހުރި އެއްޗެހިތަކެއް ހުރީމަ ފުރަތަމަ ހާމަނައިޒް ކުރެވި އެ މަޢުލޫމާތުގެ އަލީގައި ގޮތްތަކެއް ނިންމަން ޖެހުން،" އެކަމަނާ ވިދާޅުވިއެވެ.
Advertisement
ވަޒީރު އިތުރަށް ވިދާޅުވީ މިއީ ރައީސް މުޢިއްޒު ވަރަށް ގާތުން ބައްލަވާ، އަވަހަށް ކުރައްވަން ބޭނުންފުޅުވާ ކަމެއް ކަމަށާއި، އިރާދަކުރެއްވިއްޔާ މި މަސައްކަތްތައް ވަރަށް އަވަހަށް ކުރިއަށް ގެންދާނެ ކަމަށެވެ.
މިހާރު ހާއްސަ އެހީއަށް ބޭނުންވާ މީހުންނަށް އެލަވަންސްގެ ގޮތުގައި ކޮންމެ މަހަކު ދެނީ 2,000 ރުފިޔާއެވެ. ރައީސް ޑރ. މުޢިއްޒު ބޭނުންފުޅުވަނީ މި އަދަދު އިތުރުކުރެއްވުމަށެވެ. މީގެ އިތުރުން، ނުކުޅެދުންތެރިކަން ހުންނަ މީހުންނަށް މުޖުތަމަޢުގައި ފުރިހަމައަށް ބައިވެރިވެ، އާމްދަނީ ހޯދުމުގެ ފުރުސަތު ހޯދައިދިނުމަށް "އެމްޕަވަރމަންޓް ހަބް" ގެ ނަމުގައި ޚާއްޞަ މަރުކަޒެއް ވެސް އިޖްތިމާޢީ ތަރައްޤީއާބެހޭ ވުޒާރާއިން ޤާއިމްކޮށްފައިވެއެވެ.
