ދުޅަހެޔޮ ޢާއިލާތަކެއް ރާއްޖޭގައި ޤާއިމްކުރެވިގެންދާނީ މުޖުތަމަޢުގެ ހުރިހާ ފަރާތްތަކެއް އެކުގައި މަސައްކަތް ކުރެވިގެންކަމަށް ޖެންޑަރ، ފެމިލީ އެންޑް ސޯޝަލް ސަރވިސަސްގެ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
ވަޒީރު މިހެން ވިދާޅުވީ ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) އިން އިންތިޒާމްކޮށްގެން ބޭއްވި 2 ދުވަހުގެ މަދަނީ ޖަމުޢިއްޔާތަކުގެ މަހާސިންތާގެ ހުޅުވުމުގެ ރަސްމިއްޔާތުގައި ޝަރަފުވެރި މެހެމާނެއްގެ ހައިސިއްޔަތުން ދެއްކެވި ވާހަކަފުޅުގައެވެ.
ވަޒީރު ވިދާޅުވީ، ރާއްޖޭގެ އެކި ކަންކޮޅުތަކުގައި ހަރަކާތްތެރިވާ މަދަނީ ޖަމްޢިއްޔާތަކުގެ އެހީތެރިކަމާއި އެއްބާރުލުމަކީ، ސަރުކާރުގެ މި އަމާޒަށް ވާސިލުވުމަށް ލިބިގެންދާ ވަރަށްބޮޑު ހިތްވަރެއް ކަމަށެވެ. އަދި އަނިޔާ ލިބޭ ފަރާތްތަކަށް ބޭނުންވާ ތަފާތު އެހީތެރިކަމާއި ޚިދުމަތްތައް ފޯރުކޮށްދޭނެ ޤާބިލު ޖަމްޢިއްޔާތައް އުފެދި، ހަރަކާތްތެރިވަމުން ދާކަން އުފަލާއެކު ވަޒީރު ފާހަގަކުރެއްވިއެވެ.
Advertisement
"އަނިޔާ ލިބޭ ފަރާތްތަކަށް ބޭނުންވާ އިޖުތިމާޢީ، އިޤްތިޞާދީ، މާލީ އަދި ޤާނޫނީ އެހީތެރިކަން ފޯރުކޮށްދޭ ޖަމްޢިއްޔާތަކަކީ ޒަމާނުއްސުރެން ދިވެހިރާއްޖޭގައި އެކިފެންވަރުގައި ހަރަކާތްތެރިވަމުންދާ އަދި މިހާރުވެސް އެފަދަ ޚިދުމަތްތައް ފޯރުކޮށްދިނުމުގައި އަމަލީގޮތުން މަސައްކަތް ކުރާ ފަރާތްތަކެއް," ވަޒީރު ވިދާޅުވިއެވެ.
އެގޮތުން، މި މަހާސިންތާގެ ސަބަބުން އަނިޔާގެ ޝިކާރައަކަށްވާ ފަރާތްތަކަށް އެހީތެރިކަން ފޯރުކޮށްދިނުމަށް ހަރަކާތްތެރިވާ ޖަމްޢިއްޔާތަކާއި ދައުލަތުގެ އިދާރާތަކާ ދެމެދު އޮންނަ ގުޅުން އިތުރަށް ހަރުދަނާވެ، ގުޅިގެން މަސައްކަތް ކުރެވޭނެ ގޮތްތަކެއް ޤާއިމުވެގެންދާނެ ކަމަށް ވަޒީރު ފާހަގަކުރެއްވިއެވެ.
"އެންމެން ގުޅިގެން މަސައްކަތްކޮށްފިނަމަ، ވަކި ޖިންސަކަށް ވީތީ ކުރާ އަނިޔާ ހުއްޓުވި، މި މުޖުތަމަޢަކީ އެކުވެރި، ހަމަހަމަ އަދި އޯގާތެރި މުޖްތަމަޢެއްގެ ގޮތުގައި ބިނާކުރެވި، އަންނަން އޮތް ޖީލުތަކަށް ފަޚުރުވެރިވެވޭފަދަ ޤައުމެއްގެ ގޮތުގައި މި ޤައުމު ދޫކޮށްލެވޭނެ," ވަޒީރު ވިދާޅުވިއެވެ.
މި މަހާސިންތާގެ މަޤްޞަދަކީ އަނިޔާގެ ޝިކާރައަކަށްވާ ފަރާތްތަކަށް އެހީތެރިވުމުގައި ދައުލަތާއި މަދަނީ ޖަމްޢިއްޔާތަކުގެ މެދުގައި އޮންނަ ގުޅުން އިތުރަށް ބަދަހިކޮށް، އެއްބާރުލުން އިތުރުކުރުމެވެ.
މި މަހާސިންތާގައި ރާއްޖޭގެ އެކި ކަންކޮޅުތަކުން އައިސްފައިވާ މަދަނީ ޖަމްޢިއްޔާތަކުގެ މަންދޫބުންނާއި، ކަމާގުޅޭ ދައުލަތުގެ އިދާރާތަކުގެ އިސްވެރިން ބައިވެރިވެ ވަޑައިގަންނަވައެވެ. މި މަހާސިންތާގެ ތެރެއިން އަނިޔާ ލިބޭ ފަރާތްތަކަށް އެހީތެރިވުމުގައި ދިމާވާ ގޮންޖެހުންތަކާއި، އެކަންކަން ހައްލުކުރެވިދާނެ ގޮތްތަކާ ބެހޭގޮތުން މަޝްވަރާކުރެވޭނެއެވެ.
