ވިއްސާރައިގައި ގެއްލުންވި ފަރާތްތަކަށް އެހީތެރިކަން ފޯރުކޮށްދީފި

ނިމިދިޔަ ހަފްތާ ބަންދުގައި ކުރި ވިއްސާރައިގެ ސަބަބުން ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދެމުންދާ ކަމަށް އިޖްތިމާއީ އަދި އާއިލީ ތަރައްގީއާ ބެހޭ ވުޒާރާއިން މިއަދު ހާމަކޮށްފިއެވެ.

އެ ވުޒާރާއިން ބުނީ ނެޝަނަލް ޑިޒާސްޓާރ މެނޭޖްމެންޓް އޮތޯރިޓީއާ ގުޅިގެން، ވިއްސާރައާ ގުޅިގެން ގެއްލުން ލިބުނު ގެތަކަށް ޒިޔާރަތްކޮށް ގެތަކުގެ އެސެސްމެންޓު ހެދުމުގައި ހަރަކާތްތެރިވެފައިވާ ކަމަށެވެ. މީގެ އިތުރުން، އެހީތެރިކަން ބޭނުންވާ ފަރާތްތައް ދެނެގަތުމާއެކު، އެ ފަރާތްތަކަށް ފޯރުކޮށްދޭންޖެހޭ އެހީތެރިކަން ފޯރުކޮށްދިނުމުގައި ވެސް އެ ވުޒާރާއިން ގެންދަނީ ހަރަކާތްތެރިވަމުން ހާމަކުރިއެވެ.

އާއިލީ ތަރައްގީއާއި އިޖުތިމާއީ ދުޅަހެޔޮކަން ކަށަވަރުކުރުމަށް ކުރެވޭ މަސައްކަތްތަކަކީ ހާއްސަ އިސްކަމެއް ދީގެން ކުރަމުންދާ މަސައްކަތެއްކަމަށް އެ ވުޒާރާއިން ބުންޏެވެ.

އެގޮތުން، ނެޝަނަލް ޑިޒާސްޓާ މެނޭޖްމަންޓް އޮތޯރިޓީއާއި މޯލްޑިވްސް ރެޑްކްރެސެންޓާއެކު ކުރެވުނު މަސައްކަތްތަކުގެ ތެރެއިން މާލެ، ހުޅުމާލެ އަދި ވިލިމާލެއިން ގެއްލުން ލިބިގެން ރިޕޯޓުކުރެވުނު ގިނަ ގެތަކަށް ޒިޔާރަތްކޮށްފައިވާކަމަށް ވުޒާރާއިން ފާހަގަކުރިއެވެ.

މި ވިއްސާރައިގައި ގެއްލުން ލިބުނު މިންވަރާއި އެހީ ބޭނުންވާ ފަރާތްތަކުގެ އަދަދު އަދި ހާމަކޮށްފައެއް ނުވެއެވެ. ނަމަވެސް، އިޖްތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނީ ގެއްލުން ލިބުނު ހުރިހާ ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމަށް މަސައްކަތް ކުރަމުންދާ ކަމަށެވެ.