ދިވެހިން އާންމުކޮށް ބޭނުންކުރާ ބޭސްތައް އެއްވެސް އުނދަގުލަކާއި ނުލައި ފޯރުކޮށްދެވޭނެ ކަމުގެ ޔަގީންކަން އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް މިއަދު ދެއްވައިފިއެވެ.

ބޭސް ލިބުމުގައި ދިމާވެފައިވާ ދަތިތަކާއި ގުޅޭގޮތުން މީޑިއާތަކުން ކުރި ސުވާލުތަކަށް ޖަވާބު ދެއްވަމުން ޝިމާދު ވިދާޅުވީ، މި މައްސަލަ ހައްލުކުރުމަށް އެމްއެފްޑީއޭ އާއި ގުޅިގެން އެސްޓީއޯއިން މަސައްކަތްތަކެއް ކުރަމުން އަންނަ ކަމަށެވެ. އަދި އާންމުންގެ ފަރާތުން ލިބިފައިވާ ޝަކުވާތަކަށް ވަރަށް އަވަހަށް އެކަށީގެންވާ ހައްލެއް ގެނައުމަކީ އެ ކުންފުނީގެ އަމާޒު ކަމަށް ޝިމާދު ވިދާޅުވިއެވެ.

"ދިވެހިން ބޭނުންވާ އަސާސީ ބޭސްތައް ނުލިބިގެން އުޅެން ނުޖެހޭނެ ކަމުގެ ކަށަވަރުކަން އަޅުގަނޑު އަރުވަން," ޝިމާދު ވިދާޅުވިއެވެ.

ބޭސް ލިބުމުގައި ދިމާވާ ދަތިތަކުގެ ތެރޭގައި ޑޮކްޓަރުން ބޭސް ސިޓީ ލިޔާއިރު ވަކި ބްރޭންޑެއްގެ ނަން ލިޔުމާއި، ރާއްޖޭގެ އެޕްރޫވްޑް ޑްރަގް ލިސްޓުގައި ނެތް ބޭސްތައް ބޭސް ސިޓީގައި ލިޔުން ހިމެނޭ ކަމަށް ޝިމާދު ފާހަގަކުރެއްވިއެވެ. މި މައްސަލަތައް ހައްލުކުރުމަށް ޑޮކްޓަރުންނާއި ގުޅިގެން މަސައްކަތްކުރަމުންދާ ކަމަށް ޝިމާދު ވިދާޅުވިއެވެ.

ރާއްޖޭގައި ބޭނުންކުރުމަށް ހުއްދަދީފައިވާ ބޭހުގެ ލިސްޓުގައި ގާތްގަނޑަކަށް 4,000 ބާވަތެއްގެ ބޭސް ހިމެނޭ ކަމަށާއި، މުހިންމު ބޭހެއް މި ލިސްޓުގައި ނެތް ހާލަތެއްގައި އަދި އެކަމާއި ގުޅިގެން ގިނަ ޝަކުވާތަކެއް ލިބިއްޖެނަމަ އެ ބޭސްތައް ރާއްޖޭގައި ރަޖިސްޓަރީކޮށް، އިމްޕޯޓުކުރަން މަސައްކަތްކުރާނެ ކަމަށް ޝިމާދު ވިދާޅުވިއެވެ.

މި މައްސަލައަށް އޮތް އެންމެ ބޮޑު ހައްލަކީ ބޭސް ސިޓީ ލިޔާއިރު، ރާއްޖޭގައި ލިބެން ހުރި ބޭސްތަކާއި އޭގެ ޖެނެރިކް ނަން ޑޮކްޓަރުންނަށް އެނގުން ކަމަށް ޝިމާދު ފާހަގަ ކުރެއްވިއެވެލ.

ރައީސް ޑރ. މުހައްމަދު މުއިއްޒު ވެސް މިދިޔަ ބުރާސްފަތި ދުވަހު އިއްވެވި ރިޔާސީ ބަޔާނުގައި ބޭހުގެ އަގު ކޮންޓްރޯލް ކުރުމުގެ ސަބަބުން އާންމުންނަށް ދިމާވެފައިވާ ދަތިތައް ފާހަގަކުރައްވައި، މި އަހަރު އިތުރު ފިޔަވަޅުތައް ވަރުގަދަ ކުރާނެ ކަމަށް ވިދާޅުވެފައި ވެއެވެ.