އެސްޓީއޯ ޕީޕަލްސް ޗޮއިސްގެ ހިދުމަތްތައް އިތުރަށް ފުޅާކޮށް، އެ ފިހާރައިގެ ފުރަތަމަ ފަންގިފިލާ ރަސްމީކޮށް ހުޅުވައިފިއެވެ.

މި އައު ފަންގިފިލާ ހުޅުވުމަށްޓަކައި މިއަދު ބޭއްވި ހާއްސަ ރަސްމިއްޔާތު ޝަރަފްވެރިކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް އަލްފާޟިލް މުހައްމަދު ސަޢީދެވެ. މި ހަފްލާގައި އެސްޓީއޯގެ ބޯޑު މެންބަރުންނާއި، އެކްސްކޯ މެންބަރުންގެ އިތުރުން އެސްޓީއޯ ޖެނެރަލް ޓްރޭޑިންގްގެ ބްރޭންޑްތަކުގެ ސަޕްލަޔަރުންނާއި ކްލައިންޓުން ބައިވެރިވެވަޑައިގެންނެވިއެވެ.

1991 ވަނަ އަހަރު ހުޅުވުނު އެސްޓީއޯ ޕީޕަލްސް ޗޮއިސްއަކީ ރާއްޖެއަށް ސުޕަރމާކެޓް ކޮންސެޕްޓް ތައާރަފްކޮށްދިން ފިހާރައެވެ. އޭގެ ފަހުން 2022 ވަނަ އަހަރު ބޮޑެތި ބަދަލުތަކަކާއެކު ރާއްޖޭގެ ފުރަތަމަ ހައިޕަރމާކެޓްގެ ގޮތުގައި މިތަން ތަރައްޤީކުރެވުނެވެ. އަދި 2026 ވަނަ އަހަރުގެ ފެބްރުއަރީ މަހު ހުޅުމާލޭގައި ހުޅުވުނު އައުޓްލެޓާއެކު މި ޚިދުމަތް ވަނީ މާލެ ސަރަހައްދަށް އިތުރަށް ފުޅާވެގެން ގޮސްފައެވެ.

މިއަދު އަލަށް ހުޅުވުނު ފުރަތަމަ ފަންގިފިލާ ހާއްސަކޮށްފައިވަނީ ހޯމް އިމްޕްރޫވްމަންޓް ސާމާނާއި ގޭތެރެ ރީތިކުރުމަށް ބޭނުންވާ ހޯމް ޑެކޯ އައިޓަމްތަކަށެވެ. މީގެ އިތުރުން ޕްރޮކިޔޯ ޕްލަސް، ޕީކަބޫ އަދި ރައިމްބޯ ހޯމް އިމްޕްރޫވްމަންޓްގެ ޑިސްޕްލޭ ޒޯނެއް މި ފަންގިފިލާގައި ހިމެނެއެވެ. އަދި ދުނިޔޭގެ މަޝްހޫރު ބްރޭންޑްތައް ކަމަށްވާ ފިލިޕްސް، ރަސެލްހޮބްސް، އެލްޖީ، އަދި ޑައިސަންގެ އުފެއްދުންތަކުގެ އިތުރުން، ޗައިނާގެ މަޝްހޫރު 'ސުންމީ' ބްރޭންޑްގެ އުފެއްދުންތައް ވެސް މިހާރު މިތަނުން ލިބެން ހުންނާނެއެވެ.

ކަސްޓަމަރުންނަށް ލިބޭ ފަސޭހަތަކަށް ބަލާއިރު، އާއިލާއާއެކު ވިޔަފާރިކުރަން އަންނަ ފަރާތްތަކަށް ހާއްސަކޮށްގެން ކިޑްސް ކޯނަރއެއް ވަނީ ގާއިމްކޮށްފައެވެ. އަދި ކުރިއަށް އޮތް ތަނުގައި މަޝްހޫރު 'ކޮފީ ބީން އެންޑް ޓީ ލީވްސް' ގެ އައުޓްލެޓެއް ވެސް މި ފަންގިފިލާގައި ހުޅުވުމަށް ވަނީ ހަމަޖެހިފައެވެ.

އައު ފަންގިފިލާ ހުޅުވުމާއެކު، ކުރިއަށް އޮތް ހުކުރު ދުވަހުން ފެށިގެން އާންމުންނަށް މިތަނުން ވިޔަފާރިކުރުމުގެ ފުރުސަތު ހުޅުވިގެންދާނެއެވެ. މިއީ އެސްޓީއޯއިން ރައްޔިތުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުކޮށް، އެއް ފުރާޅެއްގެ ދަށުން ގިނަ ބާވަތްތަކެއް ހެޔޮ އަގުގައި ފޯރުކޮށްދިނުމަށް އެޅުނު މުހިންމު ފިޔަވަޅެއްގެ ގޮތުގައި އެ ކުންފުނިން ފާހަގަކުރެއެވެ.