ދުނިޔޭގެ ބާޒާރުގައި ތެޔޮ އުފުލާ ބޯޓުފަހަރުގެ ޗާޓަރު އަގުތައް 600،000 ޑޮލަރުން 950،000 ޑޮލަރަށް އުފުލި، ހަކަތައިގެ ބޮޑު ކްރައިސިސްއަކާ ދުނިޔެ ކުރިމަތިލާން ޖެހުނު ނަމަވެސް ރާއްޖެއަށް ތެޔޮ އެތެރެކުރުމަށް އެއްވެސް ހުރަހެއް ކުރިމަތިވެފައެއް ނުވާ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ މެނޭޖިންގ ޑިރެކްޓަރ ޝިހާދު އިބްރާހިމް ވިދާޅުވެއްޖެއެވެ.
ބައިނަލްއަގުވާމީ ބާޒާރުގައި އަގުތައް އިންތިހާއަށް އުފުލި، އަވަށްޓެރި ބައެއް ގައުމުތަކުން ތެޔޮ ވިއްކުން ލިމިޓްކުރަން ޖެހުނު ހާލަތެއްގައި ވެސް ދިވެހި ސަރުކާރާއި އެސްޓީއޯ ގެ ހަރުދަނާ ސިޔާސަތުތަކުގެ ސަބަބުން ރާއްޖޭގެ ތެލުގެ ސަޕްލައި ވަނީ މެދުނުކެނޑި އެއްވަރެއްގައި ހިފަހައްޓާފައެވެ.
"އިޤްތިޞާދުގެ ދެފަރާތް" ފޯރަމްގައި ވާހަކަދައްކަވަމުން އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވީ، މޭ އަދި ޖޫން މަހުގެ ތެރޭގައި ތެލުގެ އަގު ތިން ގުނައަށް ބޮޑުވެގެން ދިޔައިރު ވެސް، ރާއްޖޭގެ ރައްޔިތުންނަށް އެއްވެސް ދަތިކަމެއް ނެތް ގޮތަށް ޕެޓްރޯލާއި ޑީސަލް ފޯރުކޮށްދެވިފައިވާ ކަމަށެވެ. ބޭރު ގައުމުތަކުން ތެޔޮ ދޫކުރުން ކޮންޓްރޯލް ކުރިއިރުވެސް، ރާއްޖެއިން އެފަދަ އެއްވެސް ފިޔަވަޅެއް ނާޅާ، އާންމުންނަށާއި ވިޔަފާރިތަކަށް ބޭނުންވާ މިންވަރަށް ތެޔޮ ދޫކުރަމުން ދިޔުމަކީ ސަރުކާރުގެ ދުރުވިސްނޭ ސިޔާސަތުތަކުގެ ނަތީޖާއެވެ.
Advertisement
މިއަދު އަވަށްޓެރި ސްރީލަންކާގައި ޕެޓްރޯލް ލީޓަރެއްގެ އަގު ގާތްގަނޑަކަށް 24 ރުފިޔާއަށް އަދި ޕާކިސްތާނާއި އިންޑިއާ ފަދަ ގައުމުތަކުގައި ވެސް ތެލުގެ އަގުތައް މަތީގައި ހުރިއިރު، ދިވެހިރާއްޖޭގައި ޕެޓްރޯލް ލީޓަރެއް ކޮންޓްރޯލް ކުރެވިފައިވަނީ އެންމެ 16.01 ރުފިޔާގައެވެ. ހަމައެގޮތަށް، ސަރަހައްދުގެ އެހެން ގައުމުތަކާ އަޅާބަލާއިރު ރާއްޖޭގައި ޑީސަލް ލީޓަރެއް 17.54 ރުފިޔާއަށް ލިބެން ހުރުމަކީ، ސަރުކާރުގެ ބޮޑު ސަބްސިޑީއާއި އެސްޓީއޯގެ ހަރުދަނާ ސިޔާސަތުގެ ސަބަބުން ރައްޔިތުންނަށް ލިބޭ ވަރަށް ބޮޑު ލުޔެކެވެ.
ދުނިޔޭގެ ބާޒާރުގެ ލޮޅުންތަކުން ރައްޔިތުން ސަލާމަތްކުރުމަށްޓަކައި ދިވެހި ސަރުކާރުން ދަނީ ތެލުގެ ސަބްސިޑީއަށް ބޮޑު ހޭދައެއް ކުރަމުންނެވެ. މިގޮތުން ސަރަހައްދުގެ އެހެން ގައުމުތަކާ އަޅާބަލާއިރު ރާއްޖޭގައި ތެލުގެ އަގު މާ ހެޔޮކޮށް ހިފެހެއްޓިފައިވަނީ ސަރުކާރުގެ މާލީ ބެކަޕާއި އެސްޓީއޯގެ ސްޓްރެޓީޖިކް ޕްލޭނިންގްގެ ސަބަބުންނެވެ.
