ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ މުޙައްމަދު މުޢިއްޒު ވަނީ ތަޢުލީމީ ދާއިރާއިން މިއަހަރަށް ހުރި މުހިންމު ކަންކަން ހިއްސާކުރައްވާފައެވެ.

ރައީސް ވިދާޅުވީ، ރާއްޖެއަކީ ތަޢުލީމަށް ލޯބިކުރާ، ތަހުޒީބު މުޖުތަމަޢެއް ބިނާކުރަން ބޭނުންވާ ރައްޔިތުންތަކެއް ދިރިއުޅޭ ޤައުމެއްކަމުން، ޤައުމު އާރާސްތުކޮށް ދެމެހެއްޓެނިވި ގޮތެއްގައި ބިނާކުރެވޭނީ، ޤައުމުގައި ދެވޭ ތަޢުލީމުގެ ފެންވަރު މަތިކޮށްގެން ކަމަށެވެ.

މިގޮތުން ޕްރައިމަރީ ތަޢުލީމު ހަރުދަނާ ކުރުމަށް ޓެކްނިކަލް ފެންވަރުގައި ކުރަންޖެހޭ މަސައްކަތްތައް ކުރިއަށްދާ ކަމަށާއި، ދަރިވަރުން ކިޔަވާ މަންހަޖުގެ މަޢުލޫމާތުތައް އަލުން މުރާޖަޢަ ކުރުމާއެކު، މުދައްރިސުންގެ ފަންނީ ޤާބިލުކަން އިތުރު ކުރުމުގެ ޚާއްޞަ މަސައްކަތްތަކެއް މިއަހަރުގެ ޖަނަވަރީ މަހުން ފެށިގެން ކުރިއަށް ގެންދެވޭ ކަމަށް ރައީސް ފާހަގަކުރެއްވިއެވެ.

މުދައްރިސުންގެ ދުޅަހެޔޮކަމަށްޓަކައި، ސްކޫލުގައި ހޭދަކުރާ މަސައްކަތުގެ ވަގުތު ވަކި މިންގަނޑެއްގައި ހިފެހެއްޓެވުމާއެކު، ނަފްސާނީ ފުރަތަމަ އެހީ ފޯރުކޮށްދިނުމަށް ޤާއިމްކޮށްފައިވާ ހެލްޕްލައިންގެ ޚިދުމަތް މުދައްރިސުންނަށް ވެސް ބޭނުންކުރެވޭނެ ގޮތް ހަމަޖައްސާފައިވާކަމަށް ރައީސް ވިދާޅުވިއެވެ.

"ކޫލް ސްކޫލް" ޕްރޮޖެކްޓުގެ ދަށުން ސަރުކާރުން ހިންގާ ސްކޫލުތަކުގެ 3700 އަށްވުރެ ގިނަ ކްލާސްރޫމަށް މިއަހަރު އޭސީ ފޯރުކޮށްދީ، މި އަހަރުގެ ތެރޭގައި މި މަޝްރޫޢު ނިންމަން މަސައްކަތް ކުރައްވާ ކަމަށް ރައީސް ވިދާޅުވިއެވެ. އަދި މާލެ ސަރަހައްދުގައި ސާނަވީ ތަޢުލީމުދޭ އިތުރު ސްކޫލުތައް އެޅުމުގެ މަޝްރޫޢެއް މިއަހަރު ފެށުމަށްޓަކައި ތައްޔާރު ވަމުންދާ ކަމަށް ވެސް އެމަނިކުފާނު ވިދާޅުވިއެވެ.

ރައީސް ވިދާޅުވީ، ފާއިތުވި އަހަރު ޖުމުލަ 15300 އަށްވުރެ ގިނަ ދަރިވަރުންގެ މަތީ ތަޢުލީމު ހާސިލުކުރުމަށް 1.26 ބިލިޔަން ރުފިޔާގެ މާލީ އެހީ ދީފައިވާ ކަމަށެވެ. މީގެ އިތުރުން، ޤައުމުގެ ތަރައްޤީއަށް ބޭނުންވާ ދާއިރާތަކުން މަތީ ތަޢުލީމާއި ތަމްރީނުގެ ފުރުޞަތުތައް ހޯދައިދިނުމަށް ކުރު މުއްދަތުގެ ތަމްރީނުތަކަށް 1000 ފުރުސަތު ދެވިފައިވާ ކަމަށާއި، 640 އަށްވުރެ ގިނަ ސްކޮލަރޝިޕް ފުރުސަތު މަތީ ތަޢުލީމު ހާސިލްކުރާ ދަރިވަރުންނަށް ފަހިކޮށްދެވިފައިވާ ކަމަށް ވެސް ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާ މުޙައްމަދު މުޢިއްޒު ވިދާޅުވީ، "ސަރުކާރުގެ ބަޖެޓުން ޚަރަދު ކޮށްގެން ރާއްޖޭގެ އެކި ކަންކޮޅުގައި ސްކޫލް އިންފްރާސްޓްރަކްޗަރ ޤާއިމުކުރުމުގެ 134 މަޝްރޫޢު މިއަހަރު ކުރިއަށްދާނެ" ކަމަށެވެ.

މި މަސައްކަތްތަކުގެ ސަބަބުން ރާއްޖޭގެ ތަޢުލީމީ ދާއިރާ އިތުރަށް ކުރިއަރައި، ދަރިވަރުންނަށް ލިބޭ ތަޢުލީމުގެ ފެންވަރު މަތިވެ، ޤައުމުގެ މުސްތަޤުބަލަށް ބޭނުންވާ ޤާބިލު ޖީލެއް ބިނާ ކުރުމަށް މަގު ފަހިވެގެން ދާނެއެވެ.