އުރީދޫ މޯލްޑިވްސްއިން 2024 ވަނަ އަހަރުގެ ހިއްސާގެ ފައިދާގެ ގޮތުގައި ހިއްސާއަކަށް 3 ރުފިޔާ 43 ލާރި ބެހުމަށް މިއަދު އެ ކުންފުނީގެ ޑިރެކްޓަރުންގެ ބޯޑުން ނިންމައިފިއެވެ.

އުރީދޫ މޯލްޑިވްސްއިން މައުލޫމާތު ދެއްވިގޮތުގައި، މި ޖަލްސާގައި 2024 ވަނަ އަހަރުގެ ޑިވިޑެންޑްގެ ގޮތުގައި ހުށަހަޅާނެ އަދަދުގެ އިތުރުން 2024 ވަނަ އަހަރުގެ އޮޑިޓްކޮށްފައިވާ މާލީ ހިސާބުތަކާއި އަހަރީ ރިޕޯޓު ވެސް ވަނީ ފާސްކޮށްފައެވެ.

އެ ކުންފުނިން އިތުރަށް ބުނ ގޮތުގައި، 2024 ވަނަ އަހަރުގެ ޑިވިޑެންޑް ލިބޭނީ 2025 ވަނަ އަހަރުގެ ފެބްރުއަރީ 18 ވާ އަންގާރަ ދުވަހުގެ މެންދުރު 2:00 އާއި ހަމައަށް އުރީދޫ މޯލްޑިވްސްގެ ހިއްސާދާރުންގެ ގޮތުގައި ރަޖިސްޓަރީވެފައިވާ ފަރާތްތަކަށެވެ.

މީގެ އިތުރުން 2024 ވަނަ އަހަރުގެ އޮޑިޓްކޮށްފައިވާ މާލީ ހިސާބުތަކާއި އަހަރީ ރިޕޯޓު 2025 ވަނަ އަހަރުގެ ފެބްރުއަރީ 21 ވާ ހޮނިހިރު ދުވަސް ނިމުމުގެ ކުރިން އާންމުކުރާނެ ކަމަށާއި،. އަދި މިއަހަރުގެ މާރިޗު މަހުގައި ބޭއްވުމަށް ހަމަޖެހިފައިވާ އަހަރީ އާންމު ޖަލްސާގައި 2024 ވަނަ އަހަރަށް ހުށަހަޅާ ޑިވިޑެންޑް އަދި އަހަރީ ރިޕޯޓު ފާސްކުރުމަށް ހިއްސާދާރުންނަށް ހުށަހެޅުމަށް ވަނީ ހަމަޖެހިފައި ކަމަށް ވެސް ބުންޏެވެ.

އެ ކުންފުނިން ބުނި، ހުށަހެޅިފައިވާ ޑިވިޑެންޑް ހިއްސާދާރުން ފާސްކޮށްފިނަމަ، މިއަހަރުގެ މާރިޗު މަހުގައި ޑިވިޑެންޑް ބެހުމުގެ މަސައްކަތް ފެށިގެންދާނެއެވެ. އަދި އަހަރީ އާންމު ޖަލްސާގެ ނޯޓިސް އަދި އެޖެންޑާ، 2025 ވަނަ އަހަރުގެ ފެބްރުއަރީ 22 ވާ ހޮނިހިރު ދުވަސް ނިމުމުގެ ކުރިން އެ ކުންފުނީގެ ވެބްސައިޓުގައި އާންމުކުރާނެ ކަމަށްވެސް އުރީދޫއިން ބުނެފައިވެއެވެ.