އުރީދޫ މޯލްޑިވްސްގެ މެނޭޖިން ޑިރެކްޓަރު އަދި ޗީފް އެގްޒެކެޓިވް އޮފިސަރުގެ މަގާމަށް ޝާދީ ގަވަސްމީ މިއަދު އައްޔަނުކޮށްފި އެވެ.
ޝާދީ ގަވަސްމީ މި މަގާމަށް އައްޔަނުކޮށްފައި މިވަނީ 2 ފެބްރުއަރީ 2022 އިން ފެށިގެން އެ މަގާމު ފުރުއްވަމުން ގެންދެވި ގަތަރުގެ ހާލިދު ހަސަން އަލް-ހަމާދީގެ ދައުރު ހަމަވުމާ ގުޅިގެންނެވެ.
އުރީދޫގައި 10 އަހަރަށްވުރެ ގިނަ ދުވަހު މަސައްކަތްކުރައްވާފައިވާ ޝާދީ ގަވަސްމީ ވަނީ އުރީދޫ ފަލަސްތީނުގައި މުހިންމު މަގާމުތަކެއް ވެސް ފުރުއްވައިފަ އެވެ. އެގޮތުން 2015 އިން 2018 އަށް މާކެޓިން ކޮމިއުނިކޭޝަންސް އަދި ޕަބްލިކް ރިލޭޝަންސް މެނޭޖަރުކަން، އަދި 2018 އިން 2022 އަށް ސޭލްސް ޑިރެކްޓަރުކަން ފަދަ މަގާމުތައް ފުރުއްވާފައިވެ އެވެ.
އުރީދޫ މޯލްޑިވްސްގެ މެނޭޖިން ޑިރެކްޓަރުކަމާ ހަވާލުވެވަޑައިގަތުމުގެ ކުރިން އޭނާ ހުންނެވީ އުރީދޫ ފަލަސްތީނުގެ ޗީފް ކޮމާޝަލް އޮފިސަރުގެ މަގާމުގަ އެވެ.
ތައުލީމީ ދާއިރާއަށް ބަލާއިރު، ޝާދީ ވަނީ 2004 ވަނަ އަހަރު އެމެރިކާގެ ބްރިގްހަމް ޔަންގް ޔުނިވަރސިޓީން އެޑްވަޓައިޒިން އަދި މާކެޓިން ކޮމިއުނިކޭޝަންސްގެ ދާއިރާއިން ބެޗެލާސް ޑިގްރީ ހާސިލްކުރައްވައިފަ އެވެ. އަދި 2008 ވަނަ އަހަރު ފަރަންސޭސިވިލާތުގެ އީޑީއެޗްއީސީ ބިޒްނަސް ސްކޫލުން މާކެޓިން މެނޭޖްމަންޓްގެ ދާއިރާއިން ޝާދީ ވަނީ މާސްޓާސް ޑިގްރީ ހާސިލްކުރައްވައިފަ އެވެ.
އުރީދޫ ފަލަސްތީނުގެ މާކެޓް ފުޅާކުރުމާއި، އާ ޓެކްނޮލޮޖީތައް ތައާރަފްކުރުމުގައި އިސް ދައުރެއް އަދާކުރައްވާފައިވާ ޝާދީއަކީ މެނޭޖްމަންޓް ކޮންސަލްޓިން، ބިޒްނަސް ޑިވެލޮޕްމަންޓް އަދި މާކެޓިން ކޮމިއުނިކޭޝަންސްގެ ދާއިރާއިން ފުޅާ ތަޖުރިބާތަކެއް ލިބިވަޑައިގެންފައިވާ ބޭފުޅެކެވެ.
