މަސްތުވާތަކެތީގެ ވަބާއިން ސަލާމަތްވުމަށް ފަރުވާ ހޯދަމުންދާ 19 މީހަކު މިހާރު މޯލްޑިވްސް ޕޮލިޓެކްނިކުގައި ކޯހެއް ހަދަމުން އަންނަ ކަމަށާއި، މަސައްކަތް ދަސްކުރުމަށް އެ މީހުންނަށް އިންޓާންޝިޕް ފުރުސަތު ހޯދައިދޭން ވެސް މަސައްކަތް ކުރާނެ ކަމަށް ނޭޝަނަލް ޑްރަގް އޭޖެންސީ (އެންޑީއޭ)ގެ ޗެއާޕާސަން ލުބުނާ ޒާހިރު މިރޭ ވިދާޅުވެއްޖެއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން ލުބުނާ ވިދާޅުވީ އެންޑީއޭގައި ފަރުވާ ހޯދަމުންދާ 19 މީހަކު ސެޓްފިކެޓު ލެވެލް 3ގެ އިލެކްޓްރީޝަން ކޯހެއް މިއަދު ފަށާފައިވާ ކަމަށެވެ. މިއީ އެންޑީއޭއާއި މޯލްޑިވްސް ޕޮލިޓެކްނިކާއި ގުޅިގެން ހަމަސްދުވަހަށް ކުރިޔަށް ގެންދާ ކޯހެކެވެ.
"އަޅުގަނޑުމެން މި އުންމީދުކުރަނީ މި 19 ފަރާތް ވެސް އިލެކްޓްރީޝަން ކޯސް ފުރިހަމަ ކުރާނެ ކަމަށް. އަދި ހަމަ އެއާއެކު އެ މީހުން އިލެކްޓްރީޝަނުންނާއެކު މަސައްކަތް ކުރުމުގެ އިންޓާންޝިޕް ފުރުސަތު، އަޅުގަނޑުމެން މިހާރު އެކި ތަންތަނާ ވާހަކަ ދައްކައިގެން މަޝްވަރާ ކުރަމުން މި ދަނީ," ލުބުނާ ވިދާޅުވިއެވެ.
މަސްތުވާތަކެތީގެ މައްސަލައަކީ ރާއްޖޭގައި ދިމާވެފައިވާ އެންމެ ބޮޑު އެއް އިޖުތިމާއީ މައްސަލައެވެ. މިދިޔަ އަހަރުގެ ތެރޭގައި މަސްތުވާތަކެތީގެ 1,674 މައްސަލައެއް ފުލުހަށް ހުށަހަޅާފައިވާއިރު، މި އަހަރުގެ މިހައިތަނަށް 138 މައްސަލައެއް ވަނީ ހުށަހަޅައިފައެވެ.
