މާލޭގެ ރޯޝަނީ މަގުގައި ހަދާފައިވާ ޖަންކްޝަނެއްގެ ތެރެއަށް ނަޖިހާއި ތެލާއި އެކި އެއްޗެހި އެޅޭ ގޮތަށް ހަދާފައި ހުރި ގެއެއް ހޯދައި، އެ ތަނުން މީހުން ހުސްކުރުމަށް މާލެ ސިޓީ ކައުންސިލުން މިއަދު އަންގައިފިއެވެ.

މި މައްސަލަ ބެލުމަށް މާލެ ސިޓީގެ މޭޔަރު އާދަމް އާޒިމް މިއަދު އެ ސަރަހައްދަށް ޒިޔާރަތްކުރެއްވިއެވެ. މޭޔަރު ވިދާޅުވި ގޮތުގައި، މީގެ ކުރިން ވެސް އެ ކާނުތަކަށް ނަޖިސް އެޅި ވަސް ދުވާތީ ސާފުކުރި ނަމަވެސް، ތަކުރާރުކޮށް މި މައްސަލަ ދިމާވާތީ، މުޅި މަގުގެ ދެ ފަރާތުން ކާނުތައް ނަގައި ބެލުމުން އަސްލު މައްސަލަ ދެނެގަނެވުނެވެ.

މޭޔަރު އާޒިމް ވިދާޅުވީ، ނަޖިސް ބޭރުކުރާ ތަންތަން ބަންދު ކުރުމަށް އަންގާފައިވާ ކަމަށާއި، މި މައްސަލަ ހައްލުކުރުމުން ނޫނީ އިތުރު ހުއްދަތަކެއް ކައުންސިލުން ދޫނުކުރާނެ ކަމަށެވެ. އަދި ނަޖިސް ދޫކުރި ގޭގައި ދިރިއުޅޭ މީހުން ވެސް ހުސްކުރުމަށް އަންގާފައިވާ ކަމަށް އޭނާ ވިދާޅުވިއެވެ.

މި މައްސަލަ ހައްލުކުރުމަށް އެމްޑަބްލިޔުއެސްސީ، މާލެ ސިޓީ ކައުންސިލް އަދި ހެލްތް ޕްރޮޓެކްޝަން އެޖެންސީ ގުޅިގެން މަސައްކަތް ކުރާނެ ކަމަށާއި، ކަމާބެހޭ އިދާރާތަކުން އަޅަންޖެހޭ ފިޔަވަޅުތައް އަޅާނެ ކަމަށް މޭޔަރު އާޒިމް ވިދާޅުވިއެވެ.

ފާހަގަކޮށްލެވޭ ކަމަކީ، ރޯޝަނީ މަގަކީ ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައި މާލެ ސިޓީ ކައުންސިލުން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާއި ހަވާލުކޮށްގެން ތަރައްޤީ ކުރި މަގެކެވެ. މި މަގުގައި މިފަދަ މައްސަލައެއް ދިމާވުމާއި ގުޅިގެން، ސަރުކާރުގެ ކަމާބެހޭ އިދާރާތަކުން އަވަސް ފިޔަވަޅުތަކެއް އަޅަމުންދާކަން ފާހަގަކުރެވެއެވެ.