ސިވިލް ރަޖިސްޓްރޭޝަން ނިޒާމު އަލުން ޑިޒައިންކުރުމަށް ޙަވާލުކޮށްފި

ދިވެހިރާއްޖޭގެ ސިވިލް ރަޖިސްޓްރޭޝަން، ވައިޓަލްސް ސްޓެޓިސްޓިކްސް އަދި އައިޑެންޓިފިކޭޝަން (ސީއާރްވީއެސް އައިޑީ) މެނޭޖްމަންޓް ނިޒާމު އަލުން ޑިޒައިންކުރުމުގެ މަސައްކަތް ކޮންޓްރޯލް ޑޭޓާ ތައިލެންޑް (ސީޑީޓީ) ކުންފުންޏާ އިއްޔެ ހަވާލުކޮށްފި ކަމަށް ހޯމްލޭންޑް ސެކިއުރިޓީ މިނިސްޓްރީން ބުނެފިއެވެ.

އެ މިނިސްޓްރީން މަޢުލޫމާތު ދިން ގޮތުގައި، މި މަސައްކަތް ހަވާލުކޮށްފައިވަނީ ވޯލްޑް ބޭންކްގެ ހިލޭ އެހީގެ ދަށުން، އެ މިނިސްޓްރީން ހިންގާ "ޑިޖިޓަލް މޯލްޑިވްސް ފޯ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑައިވަސިފިކޭޝަން (ޑީމެޑް) ޕްރޮޖެކްޓް" ގެ ދަށުންނެވެ.

މަސައްކަތް ހަވާލުކުރުމުގެ އެއްބަސްވުމުގައި ހޯމްލޭންޑް ސެކިއުރިޓީގެ ފަރާތުން ސޮއިކުރެއްވީ ސްޓޭޓް މިނިސްޓަރު ޑރ. މުޙައްމަދު ކިނާތެވެ. އަދި ސީޑީޓީގެ ފަރާތުން ސޮއިކުރެއްވީ އެ ކުންފުނީގެ އެމްޑީ މިސްޓާ ނާޓް ލިއުޗަރެއޮން އެވެ.

މިނިސްޓްރީން ބުނެފައިވަނީ މި އެއްބަސްވުމުގެ ދަށުން ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއަރު) ގެ ފައުންޑޭޝަނަލް އައިޑެންޓިޓިޑެންޓިޓީ ސިސްޓަމް ހަރުދަނާ ކުރުމަށް އެހީތެރިކަން ފޯރުކޮށްދޭނެ ކަމަށެވެ. އަދި މި މަސައްކަތް ކުރިއަށް ގެންދަނީ ޑީމެޑް ޕްރޮޖެކްޓްގެ ދެވަނަ ކޮމްޕޯނަންޓްގެ ދަށުން ކަމަށް ވެސް ބުނެފައިވެއެވެ.

މި އައު ނިޒާމު ގާއިމްކުރެވުމުން، ނޭޝަނަލް ސެންޓާ ފޯ އިންފޮމޭޝަން ޓެކްނޯލޮޖީގެ އީފާސް ޑިޖިޓަލް އައިޑެންޓިޓީ ނިޒާމު ހިންގުމާއި، ލޯކަލް ގަވަރންމަންޓް އޮތޯރިޓީ އަދި ކައުންސިލްތަކުގެ އާބާދީ ބެލެހެއްޓުމުގެ މަސައްކަތްތަކާއި، ސިއްހަތާބެހޭ ވުޒާރާ އަދި މޯލްޑިވްސް ސްޓެޓިސްޓިކަލް ބިއުރޯއަށް ބޭނުންވާ ތަފާސް ހިސާބުތައް، ޑިޖިޓަލް ނިޒާމެއްގެ ތެރެއިން، ސައްހަކަމާއި، ރައްކާތެރިކަމާއެކު ރިއަލްޓައިމްކޮށް ލިބޭނެ ކަމަށް މިނިސްޓްރީން ހާމަކޮށްފައިވެއެވެ.

މި މަސައްކަތް ނިމުމުން، ޑީއެންއާރް އަށް ބޭނުންވާ ސޮފްޓްވެއާ އަދި ހާޑްވެއާ ހޯދުމުގެ މަސައްކަތް ޑީމެޑް ޕްރޮޖެކްޓްގެ ދަށުން ކުރިއަށް ގެންދިއުމަށް ވަނީ ހަމަޖެހިފައެވެ.

ސީޑީޓީ އަކީ ޑިޖިޓަލް ޓްރާންސްފޮމޭޝަން އަދި ބަޔޮމެޓްރިކްއަށް ހާއްސަވެފައިވާ ޓެކްނޮލޮޖީ ހައްލުތައް ފޯރުކޮށްދޭ ކުންފުންޏެކެވެ.