މެކްސްކޮމްއިން ޑެލް ޓެކްނޮލޮޖީގެ އެހީގައި އާޓިފިޝަލް އިންޓެލިޖެންސް (އޭއައި) ބޭނުންކުރާނެ ގޮތުގެ ސެޝަންތަކެއް ބާއްވައިފި ކަމަށް މެކްސްކޮމް އިން ބުނެފިއެވެ. މި ސެޝަންތަކަކީ މެކްސްކޮމްއިން ކޮންމެ އަހަރަކު ވެސް އައިޓީ އިންޑަސްޓްރީއަށް ތަޢާރަފުވާ އައު ޓެކްނޮލޮޖީތައް އެ ކުންފުނީގެ ކްލައިންޓުންނާ ހަމައަށް ގެނެސްދިނުމަށްޓަކައި ބާއްވާ "ސީރީޒް އޮފް އިވެންޓްސް" ގެ ތެރެއިން ބޭއްވި ސެޝަންތަކެއް ކަމަށާއި، .މި ސެޝަންތަކުގައި މައިގަނޑު ގޮތެއްގައި އަލިއަޅުވާލާފައިވަނީ ޑެލް ޓެކްނޮލޮޖީސްގެ ހާޑްވެއާ ބޭނުންކޮށްގެން ރާއްޖޭގެ މާކެޓުގައި އޭއައި ކުރިއަށް ގެންދާނެ ގޮތްތަކުގެ މައްޗަށް ކަމަށް މެކްސްކޮމްގެ ޗީފް ކޮމާޝަލް އޮފިސަރ އަޙްމަދު ސިބާހު ވިދާޅުވިއެވެ. އަދި ސަރުކާރުގެ ބައެއް އިދާރާތަކާއި ބޮޑެތި އެސްއޯއީތަކުގައި އޭއައި ބޭނުންކުރުމަށް ބޭނުންވާ އިންފްރާސްޓްރަކްޗާ ޤާއިމުކުރާނެ ގޮތްތަކާ ބެހޭ މަޢުލޫމާތު ވެސް ހިއްސާކޮށްފައިވާނެ ކަމަށް އޭނާ ފާހަގަ ކުރެއްވިއެވެ.
އަހުމަދު ސިބާހު ވިދާޅުވި މިއީ ދިވެހިރާއްޖޭގައި އޭއައި ޓެކްނޮލޮޖީ ތައާރަފުކުރުމަށާއި، އޭގެ ބޭނުން އެންމެ ފުރިހަމަ ގޮތުގައި ހިފުމަށް އެޅޭ މުހިންމު ފިޔަވަޅެއް ކަމަށެވެ. އަދި މި ސެޝަންތައް ބޭއްވުމުގެ މަގްސަދަކީ، އައު ޓެކްނޮލޮޖީތަކާ ބެހޭ މަޢުލޫމާތު ކްލައިންޓުންނާ ހިއްސާކުރުމާއި، އޭއައި ދާއިރާގައި ހުރި ފުރުސަތުތަކާއި ގޮންޖެހުންތަކާ ބެހޭ ގޮތުން ހޭލުންތެރިކަން އިތުރުކުރުން ކަމަށް އޭނާ ވިދާޅުވިއެވެ..
ސިބާހު އިތުރަށް ވިދާޅުވީ އޭއައިއަކީ މަސައްކަތުގައި އިންސާނުންނަށް ވަރަށް ބޮޑެތި އެހީތެރިކަން ފޯރުކޮށްދޭ އެއްޗެއް ކަމަށާއި، މެކްސްކޮމްގެ މަގުސަދަކީ ރާއްޖެ ކަހަލަ ކުޑަކުޑަ މާކެޓެއްގައި ވެސް ވަރަށް ފަސޭހައިން އޭއައި ބޭނުންކުރެވިދާނެކަން ހާމަކުރުން ކަމަށެވެ. މި ސެޝަންގައި ބައިވެރިވި ފަރާތްތަކުގެ މެދުގައި ޚާއްސަ ލަކީޑްރޯއެއް ވެސް ބޭއްވިފައިވާކަން ފާހަގަކުރެވެއެވެ.
