ޑިޖިޓަލް ޓްރާންސްފޮމޭޝަންގެ ދާއިރާގައި އަންހެނުން ބާރުވެރިކުރުވުމުގެ ގޮތުން "އެމްޕަވަރިންގް ވިމެން އެންޓަޕްރެނާސް ތްރޫ ޑިޖިޓަލް ޓްރާންސްފޮރމޭޝަން"ގެ ނަމުގައި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީ އާއި އދ. ގެ އޭޕީސީއައިސީޓީ ގުޅިގެން ތަމްރީނު ޕްރޮގްރާމެއް މިއަދު ފަށައިފިއެވެ.
މި ޕްރޮގްރާމް ފެށުމުގެ ގޮތުން ހ. މީރުމާ ހޯލުގައި މިއަދު ހެނދުނު ވަނީ ޚާއްސަ ރަސްމިއްޔާތެއް ބާއްވާފައެވެ. އެ ރަސްމިއްޔާތު ޝަރަފުވެރިކޮށްދެއްވީ ނައިބު ރައީސްގެ އަނބިކަނބަލުން އައިޝަތު އަފްރީން މުހައްމަދެވެ. އަދި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ. އާއިޝަތު ޝިހާމް ވެސް އެ ރަސްމިއްޔާތުގައި ބައިވެރިވެވަޑައިގަތެވެ.
މިނިސްޓްރީން ނެރުނު ބަޔާނެއްގައި ބުނީ އޭޕީސީއައިސީޓީގެ ވިމެން އައިސީޓީ ފްރޮންޓިއާ އިނީޝިއޭޓިވްގެ ދަށުން ކުރިއަށް ގެންދާ މި ޕްރޮގްރާމް ޓާގެޓް ކުރަނީ އަންހެން ވިޔަފާރިވެރިންނަށް ކަމަށެވެ. އަދި، މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ ތިން ދުވަހަށް ބަހައިލައިގެން، މި މަހުގެ 14 ވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ކަމަށް ވެސް މިނިސްޓްރީން ބުންޏެވެ.
Advertisement
މި ޕްރޮގްރާމްގެ ސެޝަންތައް ނަގައި ދެއްވަނީ އޭޕީސީއައިސީޓީގެ ފަންނީ މާހިރުންނެވެ. އަދި، ޕްރޮގްރާމް ފުރިހަމަ ކުރާ ބައިވެރިންނަށް ސެޓްފިކެޓް ދިނުމަށް ވެސް ވަނީ ހަމަޖެހިފައެވެ.
މިނިސްޓްރީން ބުނި ގޮތުގައި، މި ޕްރޮގްރާމްގެ ސަބަބުން އަންހެން ވިޔަފާރިވެރިންނަށް މާލީ ހުނަރާއި ތަހުލީލުކުރުމުގެ ޤާބިލުކަން އިތުރުކޮށްދެވޭނެއެވެ. އޭގެ ސަބަބުން އެމީހުންގެ މާލީ ޙާލަތު ވަޒަންކުރުމާއި މަޢުލޫމާތު އެކަށީގެންވާ ގޮތެއްގައި މާނަކުރުމުގެ ބާރު ލިބޭނެއެވެ. އަދި ވިޔަފާރި ދެމެހެއްޓުމުގެ ރޭވުމުގެ ތެރެއިން އަންހެން ވިޔަފާރިވެރިންނަށް އެމީހުންގެ ވިޔަފާރީގައި ދިމާވާ ހުރަސްތަކާއި ކުއްލި ޙާލަތްތައް ރާވައި، ސްޓްރެޓެޖީ އެކުލަވާލައި، އަދި މެނޭޖްކުރުމަށް ބޭނުންވާ ޢިލްމާއި ހުނަރު ވެސް ލިބޭނެއެވެ.
"މި ކޯހުގެ ސަބަބުން، ވިޔަފާރިވެރިންނަށް އެމީހުންގެ ވިޔަފާރި ހިންގުމުގައި ދިމާވެދާ ނުރައްކާތަކަށް ތައްޔާރުވެ، އެފަދަ ޙާލަތްތަކުގައި ވިޔަފާރި ހުއްޓުމެއްނެތި ކުރިއަށް ގެންދިއުމަށް މަގުފަހިވެގެންދާނެއެވެ. އަދި މީގެ އިތުރުން، ކުއްލި ޙާލަތްތަކުގައި އަވަސް ނިންމުންތައް ނިންމުމުގެ ޤާބިލުކަން އިތުރުވެ، ވިޔަފާރީގެ ދެމެހެއްޓެނިވިކަން ކަށަވަރުކުރުމަށް މަގުފަހިވެގެންދާނެ އެވެ." މިނިސްޓްރީގެ ބަޔާނުގައި ބުންޏެވެ.
މީގެ އިތުރުން ޕްރޮފިޓް އެންޑް ލޮސް ސްޓޭޓްމަންޓްތައް ހެދުމާއި ޕްރޮފިޓް އިތުރުކުރާނެ ގޮތްތަކާއި ޕްރޮފިޓް މާޖިންސް، ވޭރިއަބަލް ކޮސްޓްސް އަދި ވިޔަފާރިއެއްގައި ހަދާނެ ޕްރޮފިޓް ލޮސް އެނެލިސިސް ސްކޭމު ވަސީލަތްތައް ބޭނުންކޮށްގެން ހަދާނެ ގޮތުގެ މަޢުލޫމާތު ލިބިގެންދާނެ ކަމަށް ވެސް މިނިސްޓްރީން ބުންޏެވެ.
މިނިސްޓްރީން ބުނީ މި ޕްރޮގްރާމުން ނެރެން ބޭނުންވާ ނަތީޖާއަކީ އިޤުތިޞާދީ ގޮތުން ބާރުވެރިވެފައިވާ އަންހެނުން އިތުރުވެ، އެމީހުންގެ ވިޔަފާރި ކުރިއަރުވަން ބާރު ލިބި، ފުޅާވެގެން ދިއުން ކަމަށެވެ. އަދި ވިޔަފާރީގައި އަންހެނުންނަށް ދިމާވާ ހުރަސްތައް ގިރާކޮށް ކުރިއަށްދާ އަންހެނުންތަކެއް ފެނުން ކަމަށް ވެސް މިނިސްޓްރީން ބުންޏެވެ.
