ނުކުޅެދުންތެރިކަން ހުންނަ ކުދިންގެ ބެލެނިވެރިން ނަފްސާނީ ސިއްހަތަށް ސަމާލުކަން ދިނުން ވަރަށް މުހިންމު ކަމަށް ސޯޝަލް އެންޑް ފެމެލީ ޑިވެލޮޕްމަންޓް މިނިސްޓްރީން މިއަދު ބުނެފި އެވެ.
ސޯޝަލް އެންޑް ފެމެލީ ޑިވެލޮޕްމަންޓް މިނިސްޓްރީން މިއަދު ނެރުނު ބަޔާނެއްގައި ބުނީ ނުކުޅެދުންތެރިކަން ހުންނަ ކުދިންގެ ބެލެނިވެރިން ވިސްނަން ޖެހޭ ކަންކަން ގިނަވެފައި، އަމިއްލަ ދުޅަހެޔޮކަން ކަށަވަރުކުރުމަށް ކުރަން ޖެހޭ ކަންކަން ކުރުމަށް ދަތިވާ ފަހަރު އަންނަ ކަމަށެވެ. އެހެންވެ، ނުކުޅެދުންތެރިކަން ހުންނަ ކުދިންގެ ބެލެނިވެރިން ނަފްސާނީ ސިއްހަތަށް ސަމާލުކަން ދިނުން ވަރަށް މުހިންމު ކަމަށް މިނިސްޓްރީން ބުންޏެވެ.
މިނިސްޓްރީން ބުނީ އެކަށީގެންވާ ވަރަށް ސިއްހަތަށް ފަރުވާ ނުބެހެއްޓޭ ނަމަ، ހާސްވެ، ފިކުރުބޮޑުވެ، ކުދިންނަށް އެކަށީގެންވާ މިންވަރަށް އަޅާލުން ނުދެވިދާނެ ކަމަށެވެ. އޭގެ ސަބަބުން އާއިލީ ގުޅުންތައް ހީނަރުވެ، އިޖުތިމާއީ ކަންކަމުގައި ބައިވެރިވާން ފަސް ޖެހޭ ފަހަރު އަތުވެދާނެ ކަމަށް މިނިސްޓްރީން ބުންޏެވެ.
Advertisement
ނަފްސާނީ ސިއްހަތު ދުޅަހެޔޮކަން މަތީ ބެހެއްޓުމަށް އެންމެ އަސާސީ ކަމަކީ އަމިއްލަ ނަފްސަށް އަޅާލުން ކަމަށާއި ކޮންމެ ދުވަހަކު ވެސް އަމިއްލަ ނަފްސަށް އުފާވެރިކަން ގެނެސްދޭ ކަމެއް ކޮށްލަންވާނެ ކަމަށް މިނިސްޓްރީން ބުންޏެވެ.
"މިސާލަކަށް މީރު ކާ އެއްޗެއް ކެއުން، ނުވަތަ ރަޙުމަތްތެރިއަކާއި ބައްދަލުކޮށްލައިގެން ވެސް މި އުފާވެރިކަމާއި ހިތްހަމަޖެހުން ލިބިދާނެ އެވެ،" މިނިސްޓްރީގެ ބަޔާނުގައި ބުންޏެވެ.
މީގެ އިތުރުން، ކޮންމެ ދުވަހަކު ވެސް އަމިއްލަ ނަފްސަށް ވަގުތު ކޮޅެއް ހުސްކޮށްލުން ވަރަށް މުހިންމު ކަމަށާއި މަދުވެގެން ފަސް މިނެޓު ނުވަތަ 10 މިނެޓު އެކަނި ހޭދަކޮށްލުމަކީ ހާސްވެ، ކަންބޮޑުވުމުން ތިމާ ދުރުކޮށްދޭ ކަމެއް ކަމަށް މިނިސްޓްރީން ބުންޏެވެ.
މިނިސްޓްރީން ބުނީ ފިކުރު ބޮޑުވާ ގަޑީގައި ފުންކޮށް ނޭވާލާ ކަސްރަތުކުރުމަކީ ސިކުނޑީގައި ހިނގާ ހަލުވި ފިކުރުތައް މަޑުމަޑުން ބުރަކި ޖައްސާލުމަށް އެހީތެރިވެދޭ ކަމެއް ކަމަށާއި މިގޮތަށް ނޭވާލައި ކަސްރަތުކުރާނީ، ފުންކޮށް ނޭވާއެއް ލައި، މަޑުމަޑުން އަނގައިން ނޭވާ ބޭރުކުރަމުން ކަމަށެވެ.
"އެއާއެކު، ޢާއިލާ އާއި ރައްޓެހިންނާއި ބައްދަލުކޮށް ނުވަތަ ފޯނުން ވާހަކަ ދައްކާލުމަކީ ވެސް ހިތްހަމަޖެހުމުގެ އިހުސާސް އިތުރުކޮށްދޭނެ ކަމެކެވެ. އަދި ތިމާގެ ހިޔާލާއި ފިކުރު އެމީހުންނާ ހިއްސާކުރުމާއި އެހީއެއް ބޭނުންވާ ހިނދު ފަސްނުޖެހުން ވަރަށް މުހިންމެވެ. މީގެ އިތުރުން، ކޮންމެ ދުވަހަކު ވެސް ކުދިންނާއި އެކު މަޖާ ވަގުތުކޮޅެއް ހޭދަކޮށްލުމުގެ ގޮތުން ކަމެއް ރާވާލުމަކީ ކުރެވިދާނެ ކަމެކެވެ. އަދި ކޮންމެ ދުވަހަކު ވެސް ކަސްރަތުކޮށް، ހަރަކާތްތެރިވެ އުޅުމަށް ދުވަހުގެ ތާވަލުން ކޮންމެ ވެސް ވަގުތެއް ހުސްކޮށް، ކަސްރަތުކުރުން އާދައަކަށް ހެދުމަކީ ދުޅަހެޔޮ ސިއްހަތެއްގައި ހުރުމަށް އެންމެ ބޮޑަށް އެހީތެރިވެދޭނެ އެއް ކަންތަކެވެ،" މިނިސްޓްރީން ބުންޏެވެ.
މި ހުރިހާ ކަމެއް ކުރުމަށް ފަހު ވެސް ހިތް ނުތަނަވަސްވެ، ފިކުރުބޮޑުވާ ނަމަ، ލަސްނުކޮށް ސިއްހީ ފަންނުވެރިއެއްގެ އެހީތެރިކަން ހޯދުން މިނިސްޓްރީން ވަނީ އިލްތިމާސްކޮށްފަ އެވެ.
