މުޒާހަރާއާ ގުޅިގެން، ދައުލަތުން ބަލަހައްޓަމުން އައި ކުދިން ވޭމަންޑޫއިން ބަދަލުކޮށްފި

ދައުލަތުގެ ބެލުމުގެ ދަށުން ތ. ވޭމަންޑޫގައި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ބަލަހައްޓަމުން އައި ކުދިން އެ ރަށުން ބަދަލުކޮށްފިއެވެ.

އެ ރަށުން ކުދިން ބަދަލުކޮށްފައިވަނީ، އެރަށުގައި ޤާއިމްކޮށްފައި ހުންނަ ފެމިލީ އެންޑް ޗިލްޑްރަންސް ސަރވިސް ސެންޓަރ (އެފްސީއެސްސީ) ގައި ހުރި އަންހެން ކުއްޖަކު އެތަނުގައި މަސައްކަތް ކުރާ އެ ރަށުގެ މުވައްޒަފަކަށް ޙަމަލާދިން މައްސަލަ ހޫނުވެ، އެ ރަށު ރައްޔިތުން މުޒާހަރާކޮށް ނުރުހުންފާޅުކުރުމުންނެވެ.

މުޒާހަރާގައި އެ ރަށުގެ ރައްޔިތުން ގޮވަމުން ދިޔައީ ޙަމަލާދިން އަންހެން ކުއްޖާ ރަށުން ބޭލުމަށެވެ. މި މައްސަލަ ހޫނުވުމާ ގުޅިގެން ފެމިލީ މިނިސްޓްރީގެ މުވައްޒަފުން އެރަށަށް ގޮސް، މައްސަލަ ޙައްލުކުރުމަށް މަސައްކަތް ކުރި ނަމަވެސް އެ ރަށު ކައުންސިލުން ވަނީ އެ ކުއްޖާ ރަށުން ބޭލުމަށް މިނިސްޓްރީއަށް 24 ގަޑިއިރު ދީފައެވެ.

މިކަމާ ގުޅޭ ގޮތުން މިނިސްޓްރީން ބުނީ ވޭމަންޑޫގައި އެ މިނިސްޓްރީން ބަލަހައްޓަމުން އައި ހުރިހާ ކުދިން އެހެން މަރުކަޒަކަށް ބަދަލުކޮށްފައިވާ ކަމަށެވެ. ނަމަވެސް ކުދިންގެ ކަރާމާތަށްޓަކައި، އެ ކުދިން ބަދަލުކޮށްފައިވަނީ ކޮން މަރުކަޒަކަށް ކަމެއް ހާމަކޮށްފައެއް ނުވެއެވެ.

މަޢުލޫމާތު ލިބިފައިވާ ގޮތުގައި އުމުރުން 16 އަހަރުގެ އެ އަންހެން ކުއްޖާ ވޭމަންޑޫއަށް ގެންގޮސްފައިވަނީ މީގެ ނުވަ ވަރަކަށް މަސް ކުރިންނެވެ. އެ ކުއްޖާގެ ފަރާތުން އެހެން ކުދިންނަށް އަނިޔާ ލިބޭ މައްސަލަތައް މީގެ ކުރިންވެސް ރަށު ރައްޔިތުންގެ ފަރާތުން ވަނީ ކަމާ ބެހޭ ފަރާތްތަކަށް ހުށަހަޅާފައެވެ. އެގޮތުން ސްކޫލްގައި ކިޔަވާ ކުދިންގެ ކަރުގައި ހިފުމާއި، މާރާމާރީ ހިންގުން ފަދަ މައްސަލަތަކެއް އެ ކުއްޖާގެ ފަރާތުން ކުރިމަތިވެފައިވާ ކަމަށް މަޢުލޫމާތު ލިބެއެވެ.

ވޭމަންޑުގެ އެފްސީއެސްސީގައި ތިބެނީ އެންމެ 5 ކުދިން ނަމަވެސް، މި މައްސަލައާ ގުޅިގެން އެ ކުއްޖާ އެ ރަށުގައި ބެހެއްޓުމަށް ރަށު ރައްޔިތުން ބޭނުން ނުވުމުން މިނިސްޓްރީން ނިންމާފައިވަނީ ހުރިހާ ކުދިންވެސް އެ ރަށުން ބަދަލުކުރުމަށެވެ.