ކުޑަކުދިންގެ ކަރާމާތަށް އުނިކަން ލިބިދާނެ ކަހަލަ ފޮޓޯ އާއި ވީޑިއޯ މީޑިއާގައި ދައުރު ނުކުރަން ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން އިލްތިމާސްކޮށްފި އެވެ.
އެ މިނިސްޓްރީން މިކަމަށް އިލްތިމާސްކުރީ ސީދާ ގޮތުން ނުވަތަ ނުސީދާ ގޮތުން ވިޔަސް ކުޑަކުދިންގެ ޒާތީ މައުލޫމަތު ދެނެގަނެވޭނެ ކަހަލަ ގޮތަށް އެކި މައްސަލަތަކާއި ގުޅުވައި ކުޑަކުދިންގެ ފޮޓޯ އާއި ވީޑިއޯ އާންމުކުރަމުން ދާތީ އެވެ.
މިނިސްޓްރީން މިގޮތަށް އިލްތިމާސް ކޮށްފައި ވަނީ، އުސް ޢިމާރާތެއްގެ ކުޑަދޮރުމަތީގައި ކުޑަކުއްޖަކު ނުރައްކާތެރި ގޮތަކަށް އުޅުނު މަންޒަރުތަކެއް ހިމެނޭ ވީޑިއޯއެއް ދައުރު ކުރަމުންދާ ދަނޑިވަޅެއްގައެވެ.
Advertisement
މިނިސްޓްރީން ބުނީ ސޯޝަލް މީޑިއާގައި ދައުރުކުރާ ބައެއް ފޮޓޯތަކާއި ވީޑިއޯތަކުގެ ސަބަބުން ސީދާ ގޮތުން ނުވަތަ ނުސީދާ ގޮތުން ނަމަވެސް އެ ކުދިންނަކީ ކޮން ބައެއްކަން އާންމުންގެ ތެރެއިން ބަޔަކަށް އެނގި، އެ ކުދިންގެ ކަރާމާތަށް އުނިކަން ލިބިގެންދިޔުމަކީ ކަންބޮޑުވާ ކަމެއް ކަމަށެވެ.
އެހެންވެ، ކުދިންގެ ކަރާމާތަށް އުނިކަމެއް ލިބިދާނެ އެއްވެސް ކަމެއް ވިޔަ ނުދިނުމަށް ޓަކައި އެފަދަ ފޮޓޯ އާއި ވީޑިއޯތައް މީޑިއާގައި ދައުރު ނުކުރުމަށް މިނިސްޓްރީން ވަނީ އިލްތިމާސް ކޮށްފައެވެ.
ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ 33 ވަނަ މާއްދާގައި ވަނީ ކުޑަކުދިންގެ ކަރާމަތަށް އުނިކަން އަންނަ ގޮތަކަށް ކުޑަކުދިންގެ ޒާތީ މައުލޫމާތު އެއްވެސް ފަރާތަކުން އާއްމު ކޮށްގެން ނުވާނެ ކަމަށާއި ކުށުގެ ތުހުމަތުގައިވާ ކުދިންނާއި ކުށުގެ ޝިކާރައަކަަށް ވެފައިވާ ކުދިންނާއި އެ ނޫން ވެސް ސަބަބަކަށްޓަކައި އަޅާލުމާއި ރައްކާތެރިކަން ބޭނުންވާ ކުދިންގެ ނަމާއި އެޑްރެހާއި ތައުލީމު ހާސިލްކުރާ ތަނުގެ މައުލޫމާތު ފަދަ ޒާތީ މައުލޫމާތެއް ނުވަތަ އެ ކުދިންގެ ތަސްވީރެއް ނުވަތަ ސީދާ ގޮތުން ނުވަތަ ނުސީދާ ގޮތުން ނަމަވެސް ކުއްޖާއަކީ ކާކުކަން ދެނެގެނެވޭނެ ފަދަ އެއްވެސް މައުލޫމާތެއް މީޑިއާގައި ނުވަތަ އެނޫން ވެސް ވަސީތަލެއްގައި ޝާއިއުކޮށްގެން ނުވާނެ ކަމަށް ބަޔާންކޮށްފަ އެވެ.
