ޚާއްސަ އެހީއަށް ބޭނުންވާ މީހުންނަށް އާމްދަނީ ހޯދުމުގެ ފުރުސަތު ހޯދައި ދިނުމަށް ޚާއްސަ މަރުކަޒެއް ޤާއިމްކުރަން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ނިންމައިފިއެވެ.
"އެމްޕަވަމަންޓް ހަބް" ގެ ނަމުގައި ޤާއިމްކުރާ މި ހަބަކީ ޚާއްސަ އެހީއަށް ބޭނުންވާ މީހުންނަށް ހުނަރު ދަސްކޮށްދީ، އެމީހުންގެ އުފެއްދުންތައް ވިއްކައި، ވަޒީފާ އަދާކުރެވޭނެ ފަދަ ޚާާއްސަ މަރުކަޒެއް ކަމަށް ފެމިލީ މިނިސްޓްރީން ބުންޏެވެ. އަދި އެ މަރުކަޒުން އެ މީހުންނަށް ބޭނުންވާ ހުނަރުތައް ދަސްވެ، އަމިއްލަ މަސައްކަތްތައް ފަށައި އަދި އާމްދަނީ ހޯދުމުގެ ފުރުސަތު ހުޅުވޭނެ ކަމަށް އެ މިނިސްޓްރީން ބުންޏެވެ.
މިނިސްޓްރީން ބުނީ މި ހަބުގެ ސަބަބުން އެފަދަ މީހުންގެ ހުނަރާއި ޤާބިލުކަން ދައްކުވައިދޭން ރަނގަޅު ފުރުސަތުތަކެއް ފަހިވެގެންދާނެ ކަމަށެވެ.
Advertisement
މިނިސްޓްރީން ބުނީ މި މަސައްކަތަށް ޚާއްސަ ޢިމާރާތެއް އިންތިޒާމް ކުރުމުގެ މަސައްކަތް ކުރަމުން އަންނަ ކަމަށާއި، އެ މަރުކަޒުގެ ބޭނުން ކޮންމެ ވަގުތެއްގައިވެސް ބޭނުންކުރުމުގެ އިންތިޒާމް ހަމަޖެހިގެންދާނެ ކަމަށެވެ. އަދި އެ މަރުކަޒުގައި ވިޔަފާރި ކުރުމުގެ ފުރުސަތާއި، މަސައްކަތްތެރިން ހޯދުމުގެ ފުރުސަތުވެސް ލިބޭނެ ކަމަށް މިނިސްޓްރީން ބުންޏެވެ.
މިނިސްޓްރީން ބުނީ އެ މަރުކަޒު ހިންގާނެ ގޮތުގެ މޮޑެލް ފައިނަލްކުރުމުގެ މަސައްކަތް ވެސް ކުރަމުން އަންނަ ކަމަށެވެ.
