އޮސްޓްރޭލިއާގެ ސަރުކާރުން އެ ޤައުމުގައި 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާ ޤާނޫނެއް އެ ޤައުމުގެ ޤާނޫނު ހަދާ މަޖިލީހަށް ހުށަހަޅާނެ ކަމަށް އެގައުމުގެ ޕްރައިމް މިނިސްޓަރ އެންތޮނީ އަލްބަނީސް ވިދާޅުވެއްޖެއެވެ.
މިއަހަރުގެ ތެރޭގައި މިޤާނޫނު އޮސްޓްރޭލިއާގެ މަޖިލީހަށް ހުށައެޅުމަށް ނިންމާފައިވާ ކަމަށް އެންތަނީ ވިދާޅުވިއެވެ. އަދި މި ޤާނޫނަށް އަމަލު ކުރަން ފެށޭނެ ކަމަށް ލަފާ ކުރެވެނީ، ކުރިއަށް އޮތް އަހަރު ތެރޭގައި ކަމަށް އެންތަނީ ވިދާޅުވިއެވެ.
އެންތަނީ ވިދާޅުވީ ސޯޝަލް މީޑިއާ ވަނީ ޤައުމުގެ ދަރިންގެ ހަލާކަކަށް ވެފައިކަމަށާއި، މިއީ އެކަމަށް ހުއްޓުމެއް ގެންނަންވީ ވަގުތުކަމަށެވެ. އަދި މާ ގިނައިން ސޯޝަލް މީޑިއާ ބޭނުން ކުރުމުގެ ސަބަބުން ކުދިންގެ ޖިސްމާނީ އަދި ނަފްސާނީ ދުޅަހެޔޮ ކަމަށް ނޭދެވޭ އަސަރު ކުރާ ކަމަށާއި، ކުދިން އަމިއްލަ ނަފްސާ މެދު ދެކޭ ގޮތަށް ނޭދެވޭ އަސަރު ކުރާ ކަމަށް އެންތަނީ ވިދާޅުވިއެވެ.
Advertisement
އޮސްޓްރޭލިއާ އިން އަންނަނީ ކުޑަކުދިން ސޯޝަލް މީޑިއާ ބޭނުންކުރެވޭ ގޮތްތައް ކޮންޓްރޯލް ކުރުމަށް ކުދިންގެ އުމުރު ޔަޤީން ކުރެވޭނެ ނިޒާމެއް ޓެސްޓުކުރުމުގެ މަސައްކަތްފަށާފައެވެ. މި ނިޒާމަކީ ސޯޝަލް މީޑިއާ ބޭނުން ކުރާވަރު ކޮންޓްރޯލް ކުރުމުގެ ގޮތުން މިހާތަނަށް ޤައުމަކުން އަޅާފައިވާ އެންމެ ހަރުކަށި ފިޔަވަޅެވެ.
އޮސްޓްރޭލިއާގެ އިތުރުންވެސް އެހެން ޤައުމުތަކުންވެސް އަންނަނީ ކުޑަކުދިން ސޯޝަލް މީޑިއާ ބޭނުން ކުރުން ކޮންޓްރޯލް ކުރުމަށް ޤާނޫނީ އެހީ ހޯދަމުންނެވެ. ނަމަވެސް މިހާ ހަރުކަށިކޮށް އެހެން ޤައުމަކުން މިފަދަ ފިޔަވަޅެއް އަޅާފައެއް ނުވެއެވެ.
