ރާއްޖޭގެ ދެވަނަ އިންޓަރނެޓް ގަވަރނަންސް ފޯރަމް ފަށައިފި

ރާއްޖޭގެ ދެވަނަ އިންޓަރނެޓް ގަވަރނަންސް ފޯރަމް (އައިޖީއެފް) މިއަދު ހަވީރު މޯލްޑިވްސް ނޭޝަނަލް ޔުނިވަރސިޓީގައި ފަށައިފިއެވެ. މި ފޯރަމްގެ ބައިތައް މިއަދު ވެސް ކުރިއަށްދާނެއެވެ.

ފޯރަމް ފައްޓަވައިދެއްވީ ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު، އިބްރާހިމް ވަހީދުއެވެ.

މި ފޯރަމްގައި ސަރުކާރާއި، މަދަނީ ޖަމްޢިއްޔާތަކާއި، އަމިއްލަ ފަރާތްތަކާއި، ތަޢުލީމީ ދާއިރާ އަދި ޓެކްނޮލޮޖީ ދާއިރާގެ މަންދޫބުން ބައިވެރިވެ، ޑިޖިޓަލް ދާއިރާގެ ގޮންޖެހުންތަކާއި ފުރުޞަތުތަކާ ބެހޭގޮތުން މަޝްވަރާކުރާނެއެވެ.

ފޯރަމްގައި މަޝްވަރާކުރުމަށް ހަމަޖެހިފައިވާ މައިގަނޑު ހަތަރު މައުޟޫޢަކީ:

1. ޑިޖިޓަލް އިނޮވޭޝަން ކުރިއެރުވުން

2. ޓެކްނޮލޮޖީގެ ޛަރީޢާއިން ދިވެހި މުޖުތަމަޢުތަކަށް ބާރުވެރިކަން ދިނުން

3. ދެމެހެއްޓެނިވި ތަރައްޤީ އަދި ޑިޖިޓަލް ގަވަރނެންސް ކުރިއެރުވުން

4. ސައިބަރ ސެކިއުރިޓީ އަދި މަޢުލޫމާތުގެ ސައްޙަކަން ރަނގަޅުކުރުން

ޔޫއެސްއެއިޑް، ނޭޝަނަލް ޑިމޮކްރެޓިކް އިންސްޓިޓިއުޓިއުޓް (އެންޑީއައި) އަދި ވިމެން އިން ޓެކް މޯލްޑިވްސް ގުޅިގެން ބާއްވާ މި ފޯރަމަކީ ރާއްޖޭގެ ޑިޖިޓަލް ގަވަރނަންސް ކުރިއެރުވުމަށް އެޅޭ މުހިންމު ފިޔަވަޅެކެވެ.

ފޯރަމްގެ ބައެއް ސެޝަންތައް މޯލްޑިވްސް އައިޖީއެފްގެ ފޭސްބުކް އަދި ޔޫޓިއުބް އިން ލައިވްކުރާނެއެވެ. ބައިވެރިންނަށް ޕެނަލް ޑިސްކަޝަން، ވޯކްޝޮޕް، ލައިޓްނިންގ ޓޯކްސް އަދި އެހެނިހެން ހަރަކާތްތަކުގައި ބައިވެރިވެވޭނެއެވެ.

ފާހަގަކޮށްލެވޭ ބައެއް ސެޝަންތަކުގެ ތެރޭގައި އުމުރުން ދުވަސްވީ މީހުންގެ ސައިބަރ ސޭފްޓީ، ޑިޖިޓަލް އިޤްތިޞާދުގައި އަންހެނުން ބާރުވެރިކުރުން، އަދި ނޫސްވެރިންނަށް އޮންލައިންކޮށް ކުރާ ފުރައްސާރައާ ގުޅޭ މަޝްވަރާތައް ހިމެނެއެވެ.