ރަށްރަށުގައި ދިރިއުޅޭ ޒުވާނުންނަށް ކުރިމަތިވާ ގިނަ މައްސަލަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޙައްލު ހޯއްދަވައިދެއްވަމުން ގެންދަވާ ކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު އިބްރާހިމް ވަހީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ރައީސް ހުވަދުއަތޮޅަށް ކުރައްވަމުން ގެންދަވާ ދަތުރުފުޅާ ގުޅޭގޮތުން ދައުލަތުގެ މީޑީއާއަށް މަޢުލާމާތު ދެއްވަމުންނެވެ. ވަޒީރު ވިދާޅުވީ ރައީސްގެ ސިޔާސަތުތައް ކުރީގެ ރައީސުންނާ ވަރަށް ތަފާތު ކަމަށެވެ. އެގޮތުން ކުރީގެ ރައީސުން ރަށްރަށަށް ވަޑައިގަންނަވަނީ ކެމްޕޭންތަކާއި ރަސްމިއްޔާތުތަކާ ދިމާކޮށް ކަމަށާއި، އެއާ ޚިލާފަށް ރައީސް މުޢިއްޒު ވަޑައިގަންނަވަނީ ރައްޔިތުންގެ ކަންބޮޑުވުންތައް އަޑުއައްސަވައި ޙައްލުތައް ހޯއްދަވައިދެއްވަން ކަމަށް ވަޒީރު ފާހަގަކުރެއްވިއެވެ.
"ޒުވާނުން އެންމެ ބޮޑަށް ފާހަގަކުރަނީ ވަޒީފާގެ ކަންކަން. އެއީ ރަށުގައި ތިބެގެން ވަޒީފާ އަދާކުރެވޭ ގޮތްތައް އެބޭފުޅުން އެބަ ބޭނުންވޭ. އެކަމަށް ރަށްރަށުގައި ތިއްބެވި ބޭފުޅުން ބާރުވެރިކުރުވުމަށް ކުރައްވާ މަސައްކަތުގެ ތެރެއިން އެބޭފުޅުންނަށް ގޮތްތައް އެބަ ހޯއްދަވައިދެއްވާ." ވަޒީރު ވިދާޅުވިއެވެ.
Advertisement
މީގެ އިތުރުން، ކުޅިވަރާއި ކަސްރަތުގެ ވަސީލަތްތައް ރަށްރަށުގައި ޤާއިމުކުރުމަކީވެސް ޒުވާނުން ބޭނުންވާ ކަމެއް ކަން ވަޒީރު ފާހަގަކުރެއްވިއެވެ. މިހާރު ރަށްރަށުގައި ހުރި އެފަދަ ތަންތަން ހުރީ ހަލާކުވެފައި ކަމަށާއި، މި އަހަރުގެ ބަޖެޓުގެ ތެރެއިން އެ ވަސީލަތްތައް ޤާއިމުކުރުމަށް ރައީސް މަސައްކަތް ކުރައްވަމުންދާ ކަމަށްވެސް ވަޒީރު ވިދާޅުވިއެވެ.
ރައީސްގެ މި މަސައްކަތްތަކުން، ރަށްރަށުގައި ދިރިއުޅޭ ޒުވާނުންނަށް ކުރިމަތިވާ ގިނަ މައްސަލަތަކަށް ޙައްލު ލިބި، އެ ފަރާތްތަކަށް އިތުރު ފުރުޞަތުތަކެއް ހުޅުވިގެންދާނެ ކަމަށް ވަޒީރު ވިދާޅުވިއެވެ.
