2025 ވަނަ އަހަރަށް ދައުލަތުން ކަނޑައަޅާފައިވާ ބަޖެޓުން އަމިއްލަ މީޑިޔާތަކަށް ފައިސާ ލިބިގެންދާނެ ކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާބެހޭ ވަޒީރު އިބްރާހީމް ވަޙީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ ދައުލަތުގެ މީޑިޔާ (ޕީއެސްއެމް) އިން ގެނެސްދިން "ހަފްތާ 52" ޕްރޮގްރާމްގައި ވާހަކަދައްކަވަމުންނެވެ.
މިނިސްޓަރ އަސްވާޑް ވިދާޅުވިގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިސްނެންގެވުމުގެ ދަށުން މީޑިޔާތަކަށް ދެ ކަމެއް ހަމަޖައްސަވައި ދެއްވާފައި ވެއެވެ. އެއީ މީޑިޔާ ވިލެޖް އެޅުމާއި އަމިއްލަ މީޑިޔާތަކަށް ދައުލަތުން ފައިސާ ދިނުމެވެ.
Advertisement
މީޑިޔާ ވިލެޖް އެޅުމަށް ކެބިނެޓުން ހުއްދަ ލިބިފައިވާކަމަށް ފާހަގަކުރައްވައި، މިނިސްޓަރ ވިދާޅުވީ ހުޅުމާލޭގެ އެސްޓީއޯ ހޮޓާ ހުންނަ އިމާރާތުގައި މީޑިޔާ ވިލެޖް އެޅުމުގެ މަސައްކަތް ކުރިޔަށްދާ ކަމަށެވެ. އެތަނުގައި މީޑިޔާތަކަށް މަސައްކަތް ކުރުމަށް ތަނަވަސް ޖާގަ ލިބިގެންދާނެ ކަމަށްވެސް މިނިސްޓަރ ފާހަގަކުރެއްވިއެވެ.
އަމިއްލަ މީޑިޔާތަކަށް ދައުލަތުގެ ބަޖެޓުން ފައިސާ ދިނުމާއި ގުޅޭގޮތުން ފިނޭންސް މިނިސްޓްރީއާއެކު މަޝްވަރާތައް ކުރަމުންދާ ކަމަށާއި، 2025 ވަނަ އަހަރުގެ ބަޖެޓުގައި އަމިއްލަ މީޑިޔާތަކަށް ދޭނެ ފައިސާ ހިމަނާފައިވާނެ ކަމަށް މިނިސްޓަރ އަސްވާޑް ވިދާޅުވިއެވެ. މިއީ މީޑިޔާތަކަށް ވަރަށް އުފާވެރި ޚަބަރެއް ކަމަށްވެސް އެމަނިކުފާނު ފާހަގަކުރެއްވިއެވެ.
މީޑިޔާ ވިލެޖް ހުޅުވި، އަމިއްލަ މީޑިޔާތަކަށް ދައުލަތުން ފައިސާ ދޭން ފެށުމާއެކު ރާއްޖޭގައި މީޑިޔާތަކުން ޒިންމާދާރުކަމާއެކު ހަރަކާތްތެރިވާނެ ކަމަށް މިނިސްޓަރ އުންމީދުކުރައްވާ ކަމަށްވެސް ވަނީ ވިދާޅުވެފައެވެ.
