ޤައުމުގެ މުސްތަޤުބަލު ބިނާކުރާނީ ޒިންމާދާރު އަދި ހުނަރުވެރި ޒުވާނުންކަމަށާއި، ޤައުމުގެ ސިޔާދަތާއި އިސްތިޤުލާލު ރައްކާތެރިކޮށް މޮޅު ހިކުމަތުގެ އަހުލުވެރި ބަޔަކަށް ޒުވާނުން ވާންޖެހޭކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު އިބްރާހިމް ވަހީދު (އަސްވާޑު) ވިދާޅުވެއްޖެއެވެ.
ރާއްޖޭގެ ޒުވާނުންގެ ދުވަހުގެ މުނާސަބަތުގައި ފޮނުއްވި ޚިޠާބުގައި ވަޒީރު ވިދާޅުވީ، ސަރުކާރުގެ އެންމެ ބޮޑު އެއް ޒިންމާއަކީ ސަރުކާރުން ތަންފީޒުކުރައްވަމުން ގެންދަވާ ޒުވާނުންގެ ސިޔާސަތުން މަންފާ ލިބިގަނެވޭ ބަޔަކު ކަމުގައި ޒުވާނުން ހެދުންކަމަށެވެ. އެގޮތުން ޒުވާނުންގެ ސިއްޙަތާއި، ޒުވާނުންގެ ހަށިހެޔޮކަމާއި، ނަފުސާނީ ދުޅަހެޔޮކަމަށް ވިސްނަން ޖެހޭކަމަށް ވަޒީރު ވިދާޅުވިއެވެ.
"އިޤްތިޞާދީ ކުރިއެރުމަށް ފަހިވާގޮތުން އުފެއްދުންތެރި ބަޔަކަށް ވާންޖެހޭ. ދުނިޔޭގެ ވެށްޓާއި މޫސުމަށް އަންނަ ބަދަލުތަކާ ގުޅިގެން އަޅަންޖެހޭ ފިޔަވަޅުތަކަށް ހޭލުންތެރިވެ ނަތީޖާނެރޭ ބަޔަކަށް ވާންޖެހޭ. ގައުމުގެ ސިޔާދަތާއި އިސްތިގުލާލު ރައްކާތެރިކޮށް މުސްތަގުބަލުގައި ދަމަހައްޓައިދޭނޭ ތޫނު ވިސްނުމާއި، މޮޅު ހިކުމަތުގެ އަހުލުވެރި ބަޔަކަށް ޒުވާނުން ވާންޖެހޭ." ވަޒީރު ވިދާޅުވިއެވެ.
Advertisement
ވަޒީރު އިތުރަށް ވިދާޅުވީ، ރާއްޖޭގެ އިސްލާމީ ޝަޚްޞިއްޔަތަކީ ޒުވާނުންގެ ދިރިއުޅުމުގެ އެއްބައިކަމުގައި ހަދަަންޖެހޭކަމަށެވެ. އަދި އަދުގެ މައްސަލަތަކާއި އޭގެ ހައްލުތަކަށް ރިޢާޔަތްކޮށް ފުންކޮށް ވިސްނައި ޚިޔާލުކުރާ ބަޔަކަށް ޒުވާނުން ވާންޖެހޭކަމަށްވެސް ވަޒީރު ވިދާޅުވިއެވެ.
މި ސަރުކާރުގެ ސިޔާސަތުތައް އެކުލެވިފައިވަނީ މި ހުރިހާ ކަމަކާއި، އެއާއި ގުޅިފައިވާ ކަންކަން ޒުވާނުންނަށް ހާސިލްކޮށްދިނުމަށް ކަމަށް ވަޒީރު ފާހަގަކުރެއްވިއެވެ. އަދި ހަޤީޤީ މާނައިގައި ޒުވާނުންގެ ދައުރު ޒުވާނުންނަށް ލިބިދިނުމަށާއި ޤައުމީ އަމާނާތާއި މާދަމާ ހަވާލުވެވޭނޭ ނުހަނު ޤާބިލު ޒުވާނުން އުފެއްދުމަށް ކަމަށް ވިދާޅުވިއެވެ.
ދިވެހީންގެ ޤައުމު ދިވެހިގޮތުގައި މުސްތަޤުބަލުގެ ދުނިޔެއާ ފައިހަމަކުރުމަށް ބޭނުންވާ ހުރިހާ ކަމެއް މިއަދު ހާސިލްކުރުމަށް ވަޒީރު ވަނީ ޒުވާނުންނަށް އިލްތިމާސްކުރައްވާފައެވެ.
