އަނެއްކްވެސް ސްޓެލްކޯގެ ޓްރާންސްފޯމަރަކުން ވައްކަންކުރަން އުޅުނު މީހަކު ހައްޔަރުކޮށްފިއެވެ.

ސްޓެލްކޯއިން ބުނީ ރޭ ދަންވަރު 2:50 ގައި މާފަންނު މަދުރަސާ ސަރަހައްދުގައި ހުރި ސްޓެލްކޯގެ ޓްރާންސްފޯމަރ ސަބްސްޓޭޝަނަށް ވަދެ، ވައްކަން ކުރަން ވެގެން އުޅުނު މީހަކު ހައްޔަރު ކޮށްފައިވާ ކަމަށާއި، އެ މީހާ ހައްޔަރު ކުރީ ސަބްސްޓޭޝަންގެ ސީސީޓީވީ ކެމެރާއިން ފެނި، ފުލުހުންނަށް އެންގުމާއި ގުޅިގެން ސީނަށް އައި ފުލުހުންނެވެ.

ސްޓެލްކޯއިން ފާހަގަ ކޮށްފައިވާ ގޮތުގައި މާލޭގެ ސަބްސްޓޭޝަން ތަކަކީ 24 ގަޑިއިރު ކެމެރާއިން މޮނިޓަރކުރާ ތަންތަނެވެ. ނަމަވެސް، ހުޅުމާލޭގެ ދެވަނަ ފިޔަވަހީގެ ސަބްސްޓޭޝަންފަދަ ތަންތަނުން ކުރެވޭ މިފަދަ ވައްކަންތައް ހުއްޓުވުމަށް އާންމު ރައްޔިތުންގެ އެހީތެރިކަން ބޭނުންވާ ކަމަށެވެ. އަދި މިފަދަ ޢަމަލުތައް ހިންގާ ފަރާތްތަކުން، އެކަމަކީ އެމީހުންގެ ފުރާނައަށް ނުރައްކާވެދާނެ ކަމެއްކަން ދެނެގަނެ، އެފަދަ ޢަމަލުތަކުން ދުރުހެލިވުމަށް ވެސް ސްޓެލްކޯއިން އިލްތިމާސް ކުރެއެވެ.

މީގެ އިތުރުން، މިފަދަ ވައްކަންތަކުން ހޯދާ ތަކެތި ވިއްކައި އަދި ގަންނަ ފަރާތްތައް ވެސް ހޯދައި، ޤާނޫނީ ފިޔަވަޅު އެޅުމަށް ކަމާބެހޭ އިދާރާތަކަށް ސްޓެލްކޯއިން ވަނީ އިލްތިމާސް ކޮށްފައެވެ.

ފާހަގަކޮށްލަން ޖެހޭ ކަމަކީ، މީގެ ކުޑަ ދުވަސްކޮޅެއް ކުރިން ހުޅުމާލޭގައި ހުރި ސްޓެލްކޯގެ ސަބްސްޓޭޝަނުގައި ހުރި ފޯމަރުތަކަށް ގެއްލުންދީ އެއިން ވައްކަން ކުރަން އުޅުނު މީހަކު ވެސް ވަނީ ހައްޔަރު ކޮށްފައެވެ.