ސޫރިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއި ދިނުމަށް މަގުޗާޓެއް އެކުލަވައިލުމަށް ވިލާތުގެ އިއްތިޙާދުން އެއްބަސްވެއްޖެއެވެ.
ވިލާތުގެ އިއްތިޙާދުގެ ޚާރިޖީ ސިޔާސަތުތަކާއި ބެހޭ އިސްވެރިޔާ ކަޔާ ކަލަސް ވިދާޅުވި ގޮތުގައި، ސޫރިޔާ އާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއި ދިނުމަށް މަގު ޗާޓެއް ތައްޔާރު ކުރުމަށް އެ އިއްތިޙާދަށް ނިސްބަތްވާ ޚާރިޖީ ވަޒީރުން ވަނީ ނިންމާފައެވެ. ނަމަވެސް، ސޫރިޔާގެ ސަރުކާރުގެ ޢަމަލުތައް ގޯސް މިސްރާބަކަށް ދާ ކަމަށް ފާހަގަ ވެއްޖެ ނަމަ ދަތި ކުރުމުގެ ފިޔަވަޅުތައް އަލުން އިޢާދަ ކުރެވޭނެ ކަމަށް ވެސް އޭނާ ވިދާޅުވިއެވެ.
މީގެ ކުރިން، ސީރިޔާގެ އަހުލީ ހަނގުރާމައިގެ ދުވަސްވަރު އެ ޤައުމުގެ ސަރުކަރުގެ ވަކިވަކި މިނިސްޓަރުންނާއި އިޤްތިޞާދަށް އަމާޒުކޮށް ވިލާތުގެ އިއްތިޙާދުން ވަނީ ގިނަ ދަތިކުރުމުގެ ފިޔަވަޅުތަކެއް އަޅާފައެވެ. މީގެ ތެރޭގައި ސޫރިޔާއިން ތެޔޮ ބޭރު ކުރުން މަނާ ކުރުމާއި ބައިނަލްއަޤްވާމީ މާލީ ނިޒާމުތައް ބޭނުން ނުކުރެވޭ ގޮތް ހެދުން ހިމެނެއެވެ.
Advertisement
ނަމަވެސް، މިދިޔަ ޑިސެމްބަރު މަހު އެޤައުމުގެ ވެރިކަމަށް އައި ބަދަލާއި ގުޅިގެން، ވިލާތުގެ އިއްތިޙާދަށް ނިސްބަތްވާ ޤައުމުތަކުން ވަނީ އެ ޤައުމުތަކުން ސޫރިޔާއާ މެދު ޢަމަލު ކުރަމުން ދިޔަ ސިޔާސަތުތައް އަލުން މުރާޖަޢާ ކުރަން ފަށާފައެވެ. މި ބަދަލާއެކު، ސޫރިޔާ އަލުން ބިނާކޮށް އާރާސްތު ކުރުމަށް ވިލާތުގެ އިއްތިޙާދަށް ނިސްބަތްވާ ޤައުމުތަކުން އޮތީ ތައްޔާރަށެވެ.
