ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް އިންޑިއާ އާއި ގުޅިގެން ކުރެވިދާނެ މަސައްކަތްތަކާއި ގުޅޭގޮތުން މިއަދު މަޝްވަރާ ކޮށްފިއެވެ. މި މަޝްވަރާތައް ކުރެވުނީ ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރްޔަމް މާރިޔާ އާއި އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު ޖީ. ބަލަސުބްރަމަނިއަމް އާއި ދެމެދު ބޭއްވުނު ބައްދަލުވުމެއްގައެވެ.
ދަނޑުވެރިކަމާއި ބެހޭ ވުޒާރާގައި ކުރިއަށް ގެންދިޔަ މި ބައްދަލުވުމުގައި، ދެ ޤައުމު ގުޅިގެން ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް ކުރެވިދާނެ މަސައްކަތްތަކާއި ގުޅޭގޮތުން ފުޅާ ދާއިރާއެއްގައި މަޝްވަރާ ކުރެވުނު ކަމަށް ވުޒާރާއިން ހާމަކުރިއެވެ. މީގެ ތެރޭގައި އިންޑިއާގެ ދަނޑުވެރިކަމުގެ ސިނާއަތުގައި ހަރަކާތްތެރިވާ ފަންނީ މާހިރުންގެ އެހީގައި ރާއްޖޭގެ ދަނޑުވެރިކަމަށް ބޭނުންވާ ފަންނީ އެހީތެރިކަން ފޯރުކޮށްދިނުމާއި، އިންޑިއާގެ ދަނޑުވެރިކަމުގެ އުފެއްދުންތައް މާކެޓްކުރާ ޖަމާއަތްތަކާއި ގުޅިގެން ރާއްޖޭގެ ދަނޑުވެރިކަމުގެ އުފެއްދުންތައް މާކެޓްކުރެވިދާނެ ވަސީލަތްތައް ޤާއިމްކުރުމާއި ގުޅޭ މަޝްވަރާތައް ހިމެނޭ ކަމަށް ވުޒާރާއިން ބުންޏެވެ.
ވުޒާއިން ބުނީ ފުޑް ސެކިއުރިޓީ އާއި ގުޅޭ ގޮތުންނާއި، ދިރޭތަކެތީގެ ހިމާޔަތާއި ރައްކާތެރިކަން ކަށަވަރުކުރުމަށް ދެ ޤައުމު ގުޅިގެން ކުރެވިދާނެ ކަންކަމާއި ގުޅޭގޮތުން ވެސް މަޝްވަރާ ކުރެވުނު ކަމަށެވެ. އަދި ދަނޑުވެރިކަމުގެ ދާއިރާއިން ރާއްޖޭގައި މަތީ ތަޢުލީމުގެ ފުރުސަތުތައް އިތުރުކުރުމާއި ގުޅޭގޮތުން ވެސް ދެ ބޭފުޅުންގެ މެދުގައި ޚިޔާލު ބަދަލު ކޮށްފައިވާ ކަމަށް ވެސް ވުޒާރާއިން ހާމަކުރިއެވެ.
