ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. ދިއްދޫއަށް ވަޑައިގަންނަވާ ކަމުގެ ޚަބަރު އެ ރަށުގެ ރައްޔިތުންނަށް އެމްޑީޕީން ދީފައިވާ ކަމަށާއި، މި ދަތުރުފުޅާއި ގުޅިގެން ދިއްދޫގައި ހަމަނުޖެހުން ހިންގުމަށް އެމްޑީޕީން ގިނަ ޢަދަދަކަށް ފައިސާ ދެމުންދާ ކަމަށް ޚަބަރު ލިބިއްޖެއެވެ.
މަޢުލޫމާތު ދިން ފަރާތްތަކުން ބުނާ ގޮތުގައި ދިއްދޫ ދާއިރާގެ ކުރީގެ މެންބަރު (ވައްޑޭ) އާއި އެމްޑީޕީން ބޭނުންވަނީ ރައީސްއަށް ޖެއްސުން ކުރުމަށެވެ. މިހެން މި ކަން ކުރަނީ އަދުގެ ސަރުކާރުން ރާއްޖޭގެ ތަރައްޤީ މުޅިން އައު ހަރުފަތަކަށް ގެންދާތީ، އެމްޑީޕީއަށް އެކަން ހަޖަމް ނުވެގެންނެވެ.
ރައީސް މުޢިއްޒު ދިއްދޫއަށް ވަޑައިގަތުމަށް ހަމަޖެހިފައިވަނީ 2025 ޖަނަވަރީ 28 ވަނަ ދުވަހު ކަމަށް އެމްޑީޕީން ދިއްދޫގައި ތިބި އެ ޕާޓީގެ އެކްޓިވިސްޓުންނަށް ވަނީ އަންގާފައެވެ. ނަމަވެސް ރައީސް އޮފީހުން މިކަމެއް އަދި އިޢުލާނެއް ނުކުރެއެވެ.
ދިއްދޫ ރައްޔިތަކު ބުނީ ރައީސްގެ ދަތުރުފުޅާއި ގުޅިގެން ދިއްދޫ ކައުންސިލުން ވަނީ ރައީސްގެ ދަތުރުފުޅަށް ހުރަސްއެޅޭ ފަދަ އެއްވެސް ކަމެއް ނުކުރުމަށް އިލްތިމާސްކޮށްފައެވެ
ދިއްދޫގައި ހަމަނުޖެހުން ހިންގަން މަސައްކަތް ކުރާކަމުގެ އަޑުތައް ފެތުރިފައިވާއިރު އެމްޑީޕީގެ ދެ އެކްޓިވިސްޓަކު ރޭ އެރަށު ޕޮލިހަށް ހާޒިރުކޮށްފައިވާ ކަމަށް ވެސް ޚަބަރު ލިބެއެވެ.
ރައީސް މުޢިއްޒު ވިދާޅުވެފައި ވަނީ ޚިޔާލު ފާޅުކުރުމުގެ މިނިވަންކަމަށް ހުރަސް ނާޅުއްވާނެ ކަމަށާއި، ނަމަވެސް ހަމަޖެހުން ނަގާލައި ޤައުމުގެ ތަރައްޤީއަށް ހުރަސް އެޅުމަށް ފުރުޞަތު ނުދެއްވާނެ ކަމަށެވެ.
