ހއ. ދިއްދޫ ބިން ހިއްކުމުގެ މަޝްރޫއުގެ ދަށުން މިހާތަނަށް 41 ހެކްޓަރުގެ ބިން ހިއްކައި ނިމިފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ބުނެފި އެވެ.
އެމްއޭސީއެލްއިން މީޑިއާތަކަށް ފޮނުވި މެސެޖެއްގައި ބުނީ، ދިއްދޫ ބިން ހިއްކުމުގެ މަސައްކަތް ތާވަލާއެއްގޮތަށް ކުރިއަށްދާ ކަމަށެވެ. އެގޮތުން މިހާތަނަށް 41 ހެކްޓަރުގެ ބިން ހިއްކައި ނިމިފައިވާ ކަމަށާއި، މިއީ މި މަސައްކަތުގެ 36.61 މަސައްކަތް ކަމަށް އެ ކުންފުނިން ވަނީ ބުނެފަ އެވެ.
ދިއްދޫގެ ބިން ހިއްކުމުގެ މަޝްރޫއުގެ ދަށުން، އެމްއޭސީއެލުން 110 ހެކްޓަރުގެ ބިމެއް އެ ރަށަށް އިތުރުކުރާނެ އެވެ. އެ މަސައްކަތް އެމްއޭސީއެލްއިން ފެށީ މި މަހުގެ ފަސްވަނަ ދުވަހު އެވެ.
އެމްއޭސީއެލުން ބުނީ، ދިއްދޫގެ ބިން ހިއްކަނީ ލީފް އެރިކްސަން ނަމަކަށް ކިޔާ ޑްރެޖަރެއް ގެނެސްގެން ކަމަށެވެ. މި ޑްރެޖަރަކީ ދުވާލެއްގެ މައްޗަށް 46،000 ކޮޑިމީޓަރުގެ ވެލި ނެގުމުގެ ގާބިލުކަން ހުންނަ ޑްރެޖަރެއް ކަމަށް، އެމްއޭސީއެލްއިން ވަނީ އިތުރަށް ބުނެފަ އެވެ.
ދިއްދޫ ބިން ހިއްކުމުގެ މަޝްރޫއާއެކު، އެ ރަށުގައި އެއާޕޯޓް ތަރައްގީކުރުމާއި، ބޯހިޔާވަހިކަމަށް ހައްލެއް ހޯދައިދިނުމަށް ގޯއްޗާއި ފްލެޓް ދޫކުރުމުގެ އިތުރުން އުމްރާނީ ތަރައްގީގެ ބޮޑެތި މަޝްރޫއުތަކެއް ފެށިގެންދާނެ ކަމަށް މި މަސައްކަތް ކުރިއަށްގެންދާ އެމްއޭސީއެލްއިން ދެކެ އެވެ.
