މޯލްޑިވިއަން އިން އަލަށް ގެނައި ވައިޑް-ބޮޑީ މަތިންދާބޯޓުގައި ޗައިނާގެ ޗެންގްޑޫއިން ރާއްޖެއަށް ކުރި ފުރަތަމަ ދަތުރުގައި 180 ޓޫރިސްޓުން މިއަދު ރާއްޖެއަށް އައިސްފިއެވެ.
މިއަދު ހެނދުނު ރާއްޖެ އައި އެ ފްލައިޓުން ވަނީ ޖުމްލަ 192 ފަސިންޖަރުން އައިސްފަ އެވެ. އެއީ އެ ބޯޓުގެ ޖުމްލަ ކެޕޭސިޓީގެ 70 ޕަސެންޓެވެ. އޭގެ ތެރެއިން 180 މީހުންނަކީ ޓޫރިސްޓުންނެވެ. އެ ފްލައިޓުން 10 ޓަނުގެ ކާގޯ ވެސް ގެނެސްފައި ވެއެވެ.
އެއާބަސް އޭ330-200 ބޯޓުން 260 މީހުން އުފުލޭއިރު، ބިޒްނަސް އާއި ޕްރިމިއަމް އިކޮނޮމީ އަދި އިކޮނޮމީ ކްލާސްއަށް ވެސް ހާއްސަ ޖާގަތައް އެ ބޯޓުގައިވެ އެވެ.
Advertisement
ޗެންގްޑޫގެ އިތުރުން ޗައިނާގެ ބެއިޖިން އާއި ޝެންހާއީ އަށް ވެސް އެ ބޯޓުން ދަތުރުކުރަން ވަނީ ހަމަޖެހިފަ އެވެ.
ބެއިޖިން އަށް މާދަމާ ދަތުރުތައް ފަށާއިރު، ޝެންހާއީ އަށް ދަތުރުތައް ފަށާނީ އަންނަ ހޯމަ ދުވަހު އެވެ.
ޗައިނާއަކީ މިދިޔަ އަހަރު އެންމެ ގިނައިން ރާއްޖެއަށް ޓޫރިސްޓުން އައި ގައުމެވެ. މިދިޔަ އަހަރު ޗައިނާ އިން ވަނީ 250،000 އަށް ވުރެ ގިނަ ޓޫރިސްޓުން އައިސްފަ އެވެ.
މޯލްޑިވިއަން އިން މި މަހުގެ ކުރީކޮޅު ގެނައި އެއާބަސް އޭ330 މަތިންދާ ބޯޓުގެ ފުރަތަމަ މަންޒިލް ކަމަށްވާ ޗައިނާގެ ޗެންގްޑޫއަށް ދެކޮޅު ޓިކެޓެއްގެ އަގަކީ 688 ޑޮލަރު (10،610ރ.) އެވެ. ބެއިޖިންގެ ދެކޮޅު ޓިކެޓެއްގެ އަގަކީ 788 ޑޮލަރު (12،151ރ.) އެވެ. އަދި ޝެންހާއީގެ ދެކޮޅު ޓިކެޓުގެ އަގަކީ 777 ޑޮލަރު (11،981ރ.) އެވެ.
