ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން އެގްރިކަލްޗަރގެ އެކި ދާއިރާތަކުން ރާއްޖެއިން ބޭރުން މަތީ ތައުލީމު ހާސިލުކުރުމުގެ ފުރުސަތުތަކެއް ހުޅުވާލައިފިއެވެ. މި ފުރުސަތުތަކަކީ ދިވެހި ސަރުކާރާއި ވާރލްޑް ބޭންކާއި ގުޅިގެން ހިންގާ "ޓްރާންސްފޯރމިންގ ފިޝަރީޒް މެނޭޖްމަންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް" ޕްރޮޖެކްޓުގެ ދަށުން ހުޅުވާލެވިފައިވާ ފުރުސަތުތަކެއްކަމަށް އެ ވުޒާރާއިން ބުންޏެވެ.
މި ޕްރޮގްރާމުގެ ދަށުން މާސްޓަރސް ޑިގްރީއަށް އެއް ފުރުސަތު ހުޅުވާލާފައިވެއެވެ. އެއީ ޕްލާންޓް ޕްރޮޓެކްޝަން، އެންޓޮމޮލޮޖީ ނުވަތަ ޕްލާންޓް ޕެތޮލޮޖީ ދާއިރާއިންނެވެ. އަދި ބެޗްލަރސް ޑިގްރީއަށް ހަތަރު ފުރުސަތު ހުޅުވާލާފައިވެއެވެ. މީގެ ތެރޭގައި އެގްރިކަލްޗަރަލް ސައިންސް، ވެޓެރިނަރީ/ޒޫލޮޖީ/އެނިމަލް ސައިންސް، އެގްރިކަލްޗަރ (ބޮޓަނީ އެންޑް އެންޓޮމޮލޮޖީ)، އަދި ނެޗުރަލް ރިސޯސް މެނޭޖްމަންޓް/ބެޗްލަރ އޮފް އިކޮނޮމިކްސް ހިމެނެއެވެ.
އެގޮތުން، މާސްޓަރސް ޑިގްރީއަށް ކުރިމަތިލެވޭނީ ކޯހުގެ ދާއިރާއާއި ގުޅުންހުރި ދާއިރާއަކުން ބެޗްލަރސް ޑިގްރީއެއް ހާސިލުކޮށް، ގުޅުންހުރި ދާއިރާއެއްގައި ދެ އަހަރު ދުވަހުގެ ތަޖުރިބާ ލިބިފައިވާ ފަރާތްތަކަށެވެ. ބެޗްލަރސް ޑިގްރީއަށް ކުރިމަތިލެވޭނީ ޖީ.ސީ.އީ އޯލެވެލްގެ 5 މާއްދާއިން އަދި އޭލެވެލްގެ 3 މާއްދާއިން 'ސީ' އިން ފެށިގެން މަތީ ގްރޭޑެއް ހާސިލުކޮށްފައިވާ ފަރާތްތަކަށެވެ.
Advertisement
މީގެއިތުރުން، ސްކޮލަރޝިޕް ލިބޭ ފަރާތްތަކުން ކޯސް ފުރިހަމަ ކުރުމަށްފަހު ދަނޑުވެރިކަމާއި ދިރޭތަކެއްޗާ ބެހޭ ވުޒާރާގައި ޚިދުމަތްކުރަން ޖެހޭނެކަމަށް ވުޒާރާއިން ފާހަގަކުރިއެވެ. އަދި މި ފުރުސަތުތަކަށް ކުރިމަތިލުމުގައި އެ ވުޒާރާގައި މަސައްކަތްކުރާ މުވައްޒަފުންނަށް އިސްކަންދެވޭނެ ކަމަށް ވުޒާރާއިން ބުންޏެވެ.
މި ފުރުސަތުތައް ހުޅުވާލުމުގެ މަޤްޞަދަކީ ދިވެހިރާއްޖޭގެ ދަނޑުވެރިކަމުގެ ދާއިރާ ތަރައްޤީކޮށް، މި ދާއިރާއަށް ބޭނުންވާ ފަންނީ މީހުން އުފެއްދުން ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ހާމަކުރިއެވެ.
