މާޅޮސްމަޑުލު އުތުރުބުރީ (ރ) ހުޅުދުއްފާރުގައި ދެ އޭޓީއެމް މެޝިން ބެހެއްޓުމަށް އެރަށު ކައުންސިލާއިއެކު ޤައުމީ ބޭންކް ނުވަތަ ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އިން މިއަދު އެރަށު ކައުންސިލާއި އެކު އެއްބަސްވުންތަކުގައި ސޮއި ކޮށްފިއެވެ.
ހުޅުދުއްފާރުގައި އޭޓީއެމް މެޝިންތައް ބެހެއްޓުމަށް މިއަދު ސޮއިކުރީ، މިހާރު ރ. އަތޮޅުގެ ރަށްތަކަށް ރައީސުލްޖުމްހޫރިއްޔާ ކުރައްވަމުންގެންދަވާ ދަތުރުފުޅުގެ ތެރެއިން އެރަށުގައި ބޭއްވި ރަސްމިއްޔާތެއްގައެވެ. މި ރަސްމިއްޔާތު ބޭއްވުނީ ހުޅުދުއްފާރު ސްކޫލުގައެވެ. މީގެ އިތުރުން ރައީސް ވަނީ ކައުންސިލް، އަންހެނުންގެ ތަރައްޤީއަށް މަސައްކަތްކުރާ ކޮމިޓީ އަދި މުއައްސަސާތަކުގެ ވެރިންނާއި ބައްދަލުކުރައްވައި، ރައްޔިތުންނާއި ވެސް ގާތުން ބައްދަލުކުރައްވާފައެވެ.
ބީއެމްއެލްގެ އޭޓީއެމް ބެހެއްޓުމުގެ މަސައްކަތް ހުޅުދުއްފާރު ކައުންސިލާއި ޙަވާލުކުރެއްވުމުގެ އެއްބަސްވުމުގައި އެ ބޭންކުގެ ފަރާތުން ސޮއި ކުރެއްވީ ބޭންކް އޮފް މޯލްޑިވްސްގެ ޑިރެކްޓަރ އޮފް ރީޓެއިލް އެންޑް އެސް.އެމް.އީ ބޭންކިންގ ބަދުރުއްދީން ޙަސަން އެވެ. އިސްލާމިކް ބޭންކުހެ އޭޓީއެމް ބެހެއްޓުމުގެ މަސައްކަތް ހުޅުދުއްފާރު ކައުންސިލާއި ޙަވާލުކުރެއްވުމުގެ އެއްބަސްވުމުގައި އެ ބޭންކުގެ ފަރާތުން ސޮއި ކުރެއްވީ އެ ބޭންކުގެ މެނޭޖިންގ ޑިރެކްޓަރ މުފައްދަލް އިދްރީސް ޚުމްރީއެވެ. ހުޅުދުއްފާރު ކައުންސިލްގެ ފަރާތުން ސޮއި ކުރެއްވީ އެރަށު ކައުންސިލްގެ ރައީސް މުޙައްމަދު އާޠިފްއެވެ.
