ށ. އަތޮޅު ކައުންސިލުން ބޮޑު ހަރަދެއް ކޮށްގެން އެ އަތޮޅު ގޮއިދޫގައި އޮޓޯޕޮޓް ގްރީންހައުސް ފާމެއް ގާއިމްކުރުމުގެ މަޝްރޫއެއް ފަށައިފި އެވެ.

‎އެ އަތޮޅު ކައުންސިލުން ބުނީ މިއީ ށ. އަތޮޅަށް ޒަމާނީ ދަނޑުވެރިކަން ތައާރަފުކޮށް، ރައްޔިތުން ދަނޑުވެރިކަމަށް ޝައުގުވެރިކުރުވުމުގެ މަގުސަދުގައި ކުރިޔަށް ގެންދާ މަޝްރޫއެއް ކަމަށެވެ.‎ އަދި މި މަޝްރޫއުގެ ސަބަބުން ށ. އަތޮޅުގައި ޒަމާނީ ދަނޑުވެރިކަން ކުރިއަރައި، ރައްޔިތުންނަށް އިތުރު ވަޒީފާގެ ފުރުސަތުތަކެއް ހުޅެވޭނެ ކަމަށް އަތޮޅު ކައުންސިލުން ބުންޏެވެ.

‎މި މަޝްރޫއުގެ ދަށުން ގޮއިދޫގައި 1،000 އަކަފޫޓުގެ ދެ އޮޓޯޕޮޓް ގްރީންހައުސް ފާމް އަޅަން ވަނީ ހަމަޖެހިފަ އެވެ. މި މަޝްރޫއަކީ އަތޮޅު ކައުންސިލުން 450,120.ރ. ރުފިޔާ ހަރަދުކޮށްގެން، ޕްރައިމް ފާޓިލައިޒާސް މޯލްޑިވްސްއާ ހަވާލުކޮށްގެން ހިންގާ މަޝްރޫއެކެވެ.

މި މަޝްރޫޢުގެ ދަށުން އަޅާ ފާމްތައް ހިންގައި ބެލެހެއްޓުމުގެ މަސައްކަތް ކުރިއަށް ގެންދިއުމަށް ހަމަޖެހިފައި ވަނީ ގޮއިދޫ ކައުންސިލާ ހަވާލުކޮށްގެން ކަމަށް އަތޮޅު ކައުންސިލުން ބުންޏެވެ.

‎މި މަޝްރޫއުގެ ކާމިޔާބީއަށް ބަލައި، މިފަދަ އިތުރު މަޝްރޫއުތައް އަތޮޅުގެ އެހެން ރަށްރަށުގައި ވެސް ކުރިއަށް ގެންދިއުމަށް އަތޮޅު ކައުންސިލުން ވަނީ ނިންމައިފަ އެވެ.

"އަޅުގަނޑުމެންގެ އަމާޒަކީ ދަނޑުވެރިކަމުގެ ސިނާއަތް ފުޅާވެ، ކާނާއަށް ބޭރު ގައުމުތަކަށް ބަރޯސާ ވާ މިންވަރު ކުޑަކޮށް، ރައްކާތެރި ކާބޯތަކެތި އަޅުގަނޑުމެންގެ ދަނޑުފަނގުތަކުން ލިބިގެން ދިއުމެވެ. މި އަމާޒަށް ވާސިލްވުމަށް ފަރުދީގޮތުންނާއި ޖަމިއްޔާ ޖަމާއަތްތަކުން އިސްނަންގަވައިގެން މިފަދަ މަޝްރޫއުތައް ހިންގުމަކީ މި ވުޒާރާއިން ނުހަނު ބަލައިގަންނަ، އަދި ހިތްވަރުދޭ ކަންކަމެވެ." އަތޮޅު ކައުންސިލުން ބުންޏެވެ.

ށ. އަތޮޅު ރަށްރަށުގައި މިހާރު ވެސް ވަރަށް ފުޅާކޮށް އަންނަނީ ދަނޑުވެރިކަން ކުރަމުންނެވެ.